Имамдар ас беруде ысырап пен бәсекеге жол бермеуге шақыратын құжатты қабылдады

Бүгін Астана қаласында Қазақстан мұсылмандары діни басқармасының ұйымдастыруымен өткен «Қазақ даласындағы дәстүрлі ислам құндылықтары» атты VI Республикалық имамдар форумында елдің рухани өміріне әсер ететін маңызды құжаттар қабылданды.

Олардың бірі – «Құдайы аста ысырапқа жол бермеу» туралы құжат. Онда ас беру рәсімдерінде қарапайымдылықты ұстану, шариғат пен салт-дәстүрді үйлестіру, қоғамда жиі кездесетін ысырапшылдық пен бәсекеге жол бермеу жөнінде нақты ұсыныстар қамтылған. Құжат ҚМДБ-ның «Дін мен дәстүр» бөлімінің меңгерушісі Нұрбек Әуесханұлының қатысуымен таныстырылды.

Сондай-ақ форумда «Қазақ халқының дәстүрінде және Ислам дінінде отбасы құндылығы» атты тұғырнамалық құжат та қабылданды. Онда ата-ана мен ұрпақ арасындағы байланысты нығайту, иманды әрі тәрбиелі ұрпақ өсіру жолдары көрсетілген.

Форум қорытындысы ретінде қабылданған үндеуде қатысушылар үш негізгі бағыт бойынша елге үндеу жасады:

1. Отбасы құндылықтарын сақтау және ұрпақ тәрбиесін жүйелі жүргізу;

2. Құдайы аста ысыраптан сақтану және қарапайымдылықты насихаттау;

3. Дәстүрлі исламның рухани негіздерін қорғап, ел ішіндегі діни тұрақтылықты нығайту.

Форумға Мәдениет және ақпарат вице-министрі Қанат Жұмабайұлы, Бас мүфти Наурызбай қажы Тағанұлы, Ғұламалар және Сарапшылар кеңесінің мүшелері, медресе-колледж және қарилар орталығының басшылары, еліміздің түкпір-түкпірінен 1000-ға жуық имам (онлайн және офлайн форматта) қатысты.