Илон Маск Apple мен OpenAI-ды монополия орнатты деп сотқа берді

Илон Маск АҚШ-тың федералды сотына Apple мен OpenAI компанияларына қарсы шағым түсірді. Ол аталған екі компания жасанды интеллект нарығында бәсекелестікті шектеу үшін келісімге келгенін мәлімдеді, деп хабарлады Reuters.

Сот материалдарында Масктің xAI стартапы Apple мен OpenAI негізгі позицияларды өзара бөлісіп, нарыққа жаңа ойыншылардың шығуына кедергі келтіріп отырғанын алға тартады. xAI өкілдерінің сөзінше, Apple-дің OpenAI-мен эксклюзивті әріптестігі соңғысына монополиялық жағдай жасап, бәсекелестердің қосымшаларын App Store арқылы ілгерілетуіне кедергі болған.

Компания келтірілген шығынды миллиардтаған доллар деп бағалап, өтемақы талап етіп отыр. Маск сонымен қатар, қолданушылар арасында жоғары бағаланғанына қарамастан, Apple Grok чат-ботын өз ұсыныстарына қоспай отырғанын атап өтті.

OpenAI өкілдері Масктің шағымын компанияға қысым жасау әрекетінің жалғасы деп сипаттады. Ал Apple әзірге ресми пікір білдірген жоқ.

Сарапшылар бұл істі АҚШ-та жасанды интеллект нарығына қатысты алғашқы ірі антимонополиялық процесс деп бағалап отыр. Мамандардың пікірінше, соттың нәтижесі алдағы уақытта саланы реттеудің құқықтық тәжірибесін қалыптастыруға ықпал етеді.