ІІМ жүргізушілерге үндеу жасады

Ішкі істер министрлігі қыстың басталуына байланысты көлік жүргізушілері мен жаяу жүргіншілерге жолда барынша сақ болуға үндеу жасады.

Ведомство мәліметінше, ауа райының нашарлауы мен жол жағдайының қиындауына орай қозғалыс қауіпсіздігін қамтамасыз ету мақсатында жылдамдық шектеулері енгізіліп, қажет болған жағдайда жолдар толықтай жабылады.

«Қыс мезгілінде тұрақты жол белгілері орнатылады. Мәселен, 3.24 “Жылдамдықты шектеу” белгісі мен Астана–Щучинск және Астана–Теміртау бағыттарында электронды ақпараттық тақталар қойылған. Бұл белгілер боран, көктайғақ сынды жағдайларда жылдамдықты уақытша төмендетуге мүмкіндік береді», – деді ІІМ Әкімшілік полиция комитетінің ерекше тапсырмалар жөніндегі аға инспекторы Ақтоты Боранова.

Министрлік өкілінің айтуынша, жылдамдықты тіркейтін бейнекамералар да осы белгілерге сәйкес автоматты түрде бапталады.

ІІМ барлық жүргізушілер мен жаяу жүргіншілерді жол қозғалысы ережелерін қатаң сақтауға және орнатылған шектеулерді орындауға шақырды.