ІІМ Telegram-дағы жаңа алаяқтық туралы ескертті

Қазақстанның Ішкі істер министрлігі Telegram мессенджері арқылы таралып жатқан жаңа алаяқтық тәсілі туралы ескерту жасады.

Министрліктің мәліметінше, алаяқтар мемлекеттік органдардың, компаниялар мен ұйымдардың басшылары атынан хат жазысады. Сенім ұялату үшін олар шынайы басшылардың аты-жөнін, фотосуреттерін және басқа да деректерін пайдаланады.

Осыдан кейін олар қызметкерлерге басшының атынан хабарлама жіберіп, белгілі бір шотқа шұғыл ақша аударуды, тауардың немесе қызметтің ақысын төлеуді не басқа қаржылық операция жасауды талап етеді.

ІІМ мұндай хабарламалар көбіне бухгалтерлерге, қаржы қызметкерлеріне және ұйымның қаражатына қол жеткізе алатын басқа да мамандарға жіберілетінін атап өтті.

Ведомство азаматтарды мұндай хабарламаларға сенбеуге, ақша аудармас бұрын ақпаратты міндетті түрде басқа байланыс арналары арқылы нақтылап алуға шақырды.