ІІМ көлікті 5 минуттан артық қыздыру мәселесіне қатысты түсініктеме берді

Ішкі істер министрлігі көлікті 5 минуттан артық қыздыруға байланысты айыппұл салу туралы ақпаратқа түсініктеме берді.

«Қазақстан Республикасының 2023 жылғы 30 маусымдағы №534 бұйрығымен бекітілген Жол қозғалысы ережелеріне сәйкес, көліктің тоқтап тұруы – жолаушыларды отырғызу немесе түсірумен, не көлік құралын тиеу немесе түсірумен байланысты емес себептер бойынша бес минуттан артық уақытқа тоқтау», – делінген хабарламада.

ІІМ мәліметінше, ереженің 88-бабының 5-тармақшасына сәйкес, тұрғын пункттерде қозғалтқышы жұмыс істеп тұрған көлік құралдарының тұрғындарға қолайсыздық тудырған жағдайда тоқтап тұруына тыйым салынады. Бұл талап Жол қозғалысы ережесінің 122-бабының 4-тармақшасында да көрсетілген.

Министрлік бұл ереженің жаңа емес екенін, 20 жылдан астам уақыт бойы қолданылып келе жатқанын атап өтті.

«Егер көлік қозғалтқышы 5 минуттан артық жұмыс істеп тұрса және тұрғындарға қолайсыздық тудырса, бұл құқық бұзушылық ретінде қарастырылады. Дегенмен ішкі істер органдары азаматтарға жаппай айыппұл салуды мақсат етпейді. Әкімшілік іс тек тұрғындардың шағымы және құқық бұзушылықтың дәлелдері болған жағдайда ғана қозғалатынын еске саламыз», – деді ІІМ өкілдері.

Ережені бұзған жүргізушілерге 5 айлық есептік көрсеткіш (19 660 теңге) мөлшерінде айыппұл салынады. Егер заң бұзушылық қайталанса, айыппұл 10 АЕК-ке, яғни 39 320 теңгеге дейін өседі.