ІІМ ескертеді: Жаңа Конституция төңірегінде жалған ақпарат таратқандар жазаланады

Қазақстанның Ішкі істер министрлігі әлеуметтік желілер мен мессенджерлерде жаңа Конституция жобасына қатысты жалған ақпарат тарататындардың көбейгенін мәлімдеп, азаматтарға қатаң ескерту жасады.

Ведомство өкілдерінің айтуынша, қазіргі таңда цифрлық кеңістікте шындыққа жанаспайтын және арандатушылық сипаттағы жазбалар жиілеп кеткен. Министрлік азаматтардың кез келген мәселе бойынша пікір білдіруіне немесе талқылауына заңмен тыйым салынбағанын, алайда ақпаратты әдейі бұрмалап, жалған мәлімет тарату құқық бұзушылық болып саналатынын еске салды.

Бұл мәселе Үкімет деңгейінде де қаралды. 2 ақпан күні Премьер-министр Олжас Бектенов арнайы кеңес өткізіп, жаңа Конституция жобасын талқылау кезінде арандатушылыққа жол берген тұлғаларды жедел түрде анықтап, жауапқа тартуды тапсырды. Аталған бағыттағы жұмыстарды үйлестіру Премьер-министрдің орынбасары – Мәдениет және ақпарат министрі Аида Балаеваға жүктелді.

Еске сала кетейік, 11 бөлім мен 95 баптан тұратын жаңа Конституцияның жобасы 31 қаңтарда үкіметтің ресми сайтында жарияланған болатын. Дәл осы күні Алматыда жалған ақпарат таратудың алғашқы дерегі тіркеліп, құқықтық шара қолданылды. Алматы қаласының әкімшілік соты тұрғын Марат Әбдірахмановты Әкімшілік кодекстің 256-2 бабы бойынша кінәлі деп танып, оған 86 500 теңге көлемінде айыппұл салды.

Құзырлы органдар азаматтарды тек ресми ақпарат көздеріне сенуге және тексерілмеген мәліметтерді бөліспеуге шақырады.