ІІМ дабыл қақты: Соңғы үш айда есірткі сақтау және тарату күдігімен 23 жасөспірім ұсталды

Елімізде соңғы үш айдың ішінде есірткі заттарын сақтау және тарату күдігімен 23 жасөспірім ұсталды. Бұл туралы Ішкі істер министрлігінің Есірткі қылмысына қарсы іс-қимыл комитеті хабарлады.

Комитет төрағасының орынбасары Қуандық Әлжановтың айтуынша, ұсталғандар арасында колледждің 1-курс студенттері мен 9–11-сынып оқушылары бар.

"Азаматтардан өтініп сұраймыз! Кәмелетке толмағандарды есірткінің заңсыз айналымына тарту фактілері әлі де жалғасып жатыр. Бұл – өте алаңдатарлық жайт. Бұл жағдай ата-аналар мен заңды өкілдердің тарапынан ерекше бақылауды қажет етеді", – деді Әлжанов.

Оның айтуынша, заңға сәйкес, есірткі қылмыстары үшін 16 жастан бастап қылмыстық жауапкершілік қарастырылған. Қылмыстық кодекстің 296 және 297-баптарына сәйкес, есірткіні сақтау және тарату үшін бас бостандығынан айыру жазасы көзделген. Сонымен қатар 299-1-бапқа сәйкес, интернет пен әлеуметтік желілер арқылы есірткі жарнамалағандар да жауапқа тартылады.

ІІМ өкілі ата-аналарға үндеу жолдап, балаларының кіммен араласатынына және бос уақытын қалай өткізетініне назар аударуға шақырды.

"Жасөспірімдердің болашағына балта шабатын заңсыз әрекеттерге жол бермес үшін уақтылы алдын алу шараларын жүргізу өте маңызды", – деді Қуандық Әлжанов.

Министрлік кәмелетке толмағандарды құқықбұзушылықтан қорғау мақсатында превентивті шараларды күшейту қажет екенін айтты.