ІІМ: Әр екінші кісі өлімі – мас адамның қолынан

Қазақстанда биыл 11 айда ойын-сауық орындарында құқық бұзушылықтар туралы 42 мыңға жуық өтініш тіркелді, ал 1 749 факт бойынша қылмыстық іс қозғалды. Бұл туралы Сенатта өткен брифингте ішкі істер вице-министрі Санжар Әділов мәлімдеді.

ІІМ дерегінше, елде жасалатын әр екінші адам өлтіру – алкогольдік мас күйінде, ал ойын-сауық орындарында тіркелетін құқық бұзушылықтардың төрттен бірі мас адамдардың әрекетімен байланысты.

Биылғы 11 айда осы санаттағы қылмыстар бойынша:

• 10 адам өлтіру,

• 579 дене жарақатын салу,

• 8 зорлау,

• 26 тонау,

• 238 бұзақылық тіркелген.

Астанада жағдай алаңдатарлық

Әділовтің айтуынша, елордадағы ойын-сауық орындарында қылмыс деңгейі айтарлықтай жоғары.

• Астанадағы 171 мекемеде 357 қылмыс жасалған.

• 11 айда полицияға 3 431 шақырту түскен, оның 90%-ы түнгі 23:00-ден кейін.

• Ең көп шақырту түскен орындар:

  • «Панаехали» – 958 шақырту,

  • «Забери меня» – 349,

  • «Мята» – 262.

Жекелеген мекемелерде қылмыстың бірнеше рет қайталанатыны да белгілі болды.

Алматыдағы көрсеткіш те жоғары

Алматыда да жағдай күрделі.
Мұнда жыл басынан бері 3 588 өтініш тіркелген, 14-тен астам адам өлтіру фактісі анықталған.

ІІМ ойын-сауық орындарында тәртіпті күшейту және түнгі уақытта құқық бұзушылықтың алдын алу шараларын жалғастырып жатқанын хабарлады.