Хоккейден Қазақстан құрамасы Францияны жеңді

Кездесуде франциялық құрама сапынан Энцо Кантагалло 2-минутта есеп ашып кетті. Одан кейін қазақстандық хоккейші 3-минутта  таразы басын теңестірді. Ал, Максим Мухаметов 7-минутта есепті еселей түсті. 

Екінші кезеңде франциялық хоккейшілер таразы басын теңестіруге ұмтылды. Десе де діттеген мақсатына жете алған жоқ. Есесіне 37-минутта Кирилл Савицкий Қазақстан құрамасы сапында бір хоккейшінің кем ойнағанына қарамастан жеке шеберлігінің арқасында мергендік танытты. Осылайша Қазақстан құрамасы қарсыласынан 3:1 есебімен басым түсіп, әлем чемпионатын жеңіспен бастады.

Дүбірлі дода 10-26 мамыр аралығында Чехияның Прага және Острава қалаларында өтеді.

Қазақстандық хоккейшілер В тобында Франция, Словакия, Латвия, Швеция, Германия, АҚШ және Польшамен сынға түседі. В тобында 10 мамырда Швеция құрамасы АҚШ-ты 5:2, Германия Словакияны 6:4 есебімен тізе бүктірді. Сондай-ақ бұл күні А тобында Швейцария Норвегияны 5:2, Чехия Финляндияны буллиттен 1:0 есебімен жеңді.

Осы жеңісінен кейін қазақстандық хоккейшілер турнир кестесінде үшінші орынға көтерілді. Енді қазақстандық хоккейшілер алдағы ойынын 12 мамырда Словакия құрамасына қарсы өткізеді.