$ 522.38 € 612.6 ₽ 6.54

ХОК Головкин басқаратын World Boxing федерациясын уақытша мойындады

Редакция
27 ақпан 2025, 01:57
ХОК Головкин басқаратын World Boxing федерациясын уақытша мойындады Сурет авторы: ҰОК

Халықаралық Олимпиада комитетінің Атқарушы кеңесі онлайн отырыста World Boxing халықаралық федерациясын уақытша мойындау туралы шешім қабылдады, деп хабарлады Қазақстанның Ұлттық Олимпиада комитеті.

"МОК жүргізген бағалау нәтижесінде World Boxing федерациясы басқару жүйесі мен спорттық дамуға қатысты маңызды жетістіктерге жеткені анықталды. Осыған байланысты аталған ұйымды олимпиадалық қозғалыс аясында боксты әлемдік деңгейде реттейтін халықаралық федерация ретінде уақытша мойындау ұсынылды", – делінген хабарламада.

Бұл шешімге қатысты пікір білдірген Қазақстан Ұлттық Олимпиада комитетінің президенті, World Boxing Олимпиадалық комиссиясының төрағасы Геннадий Головкин федерацияның дұрыс бағытта дамып келе жатқанын атап өтті.

"ХОК-тың уақытша мойындауы – маңызды жетістік. Бұл шешім бокстың Олимпиада ойындарындағы орнын сақтап қалуға жақындағанымызды көрсетеді. Барлық мүдделі тараптардың тұрақты қолдауы мен қажырлы еңбегінің арқасында осындай нәтижеге қол жеткіздік. Әділдік пен бейтараптық қағидаларына негізделген халықаралық федерация құру – болашақ чемпиондар мен спортшылар үшін ортақ миссиямыз", – деді Геннадий Головкин.

Айта кетейік, World Boxing Олимпиадалық комиссиясы 2024 жылдың қыркүйегінде құрылған. Оның негізгі мақсаты – Халықаралық Олимпиада комитетімен бірлесе жұмыс істеп, боксты олимпиадалық бағдарламаға қайтаруға ықпал ету. Бұл бастама Халықаралық бокс қауымдастығы (IBA) бірнеше даулы жанжалдардан кейін МОК-тан ресми танылу мәртебесінен айырылғаннан кейін қолға алынған.

Соңғы жаңалықтар