Хаменеи қазасынан кейін Ирандағы билікке кім келетіні белгілі болды

АҚШ пен Израильдің әуе шабуылы кезінде қаза тапқан Иранның жоғарғы көшбасшысы аятолла Әли Хаменеинің орнына оның ұлы, 56 жастағы Мұжтаба Хаменеи келуі мүмкін. Бұл туралы Deutsche Welle дереккөздерге сүйене отырып хабарлады.

Ақпаратқа сәйкес, мұндай шешім Ислам революциясы сақшылар корпусының қысымымен қабылданған болуы ықтимал. Сонымен қатар жаңа жоғарғы көшбасшы мәселесін талқылауға шиит дінбасыларынан тұратын жоғары басқару құрылымының 88 өкілі қатысқан. Алайда әзірге бұл мәліметті растайтын ресми хабар жарияланған жоқ.

Кейбір сарапшылардың пікірінше, егер бұл ақпарат расталса, Иранда жаңа көшбасшыны таңдауда қатаң бағытты қолдайтын топтардың ықпалы басым болғанын білдіруі мүмкін.

Хаменеи қаза тапқаннан кейін елді уақытша үш адамнан тұратын кеңес басқарып отыр. Оның құрамына Иран президенті Масуд Пезешкиан, сот билігінің жетекшісі Голям Хосейн Мохсени-Эджеи және Әлиреза Арафи кіреді.

Бұған дейін Иранның жоғарғы көшбасшысы міндетін уақытша атқару да Әлиреза Арафиге жүктелгені хабарланған еді.

Аятолла Әли Хаменеи Иранды 1989 жылдан бері басқарды. Ол 28 ақпанда Тегеран қаласына жасалған әуе соққысы кезінде қаза тапқан. Иранда жоғарғы көшбасшыны ислам құқығы саласының өкілдерінен құралған 88 мүшелі Сарапшылар кеңесі сайлайды. Бұл кеңестің құрамы әр сегіз жыл сайын жаңартылып отырады, соңғы сайлау 2024 жылы өткен.

Қазір АҚШ пен Израильдің Иранға қарсы әскери операциясы жалғасып жатыр. АҚШ Тегеранның ядролық қаруға ие болуына жол бермеу керегін мәлімдеп келеді. Ал Иран билігі ядролық қару жасау ниеті жоқ екенін айтқанымен, уран байыту құқығынан бас тартпайтынын мәлімдеуде.

Иран қарымта ретінде Парсы шығанағындағы бірқатар елдерге – Кувейт, Қатар, Бахрейн, Біріккен Араб Әмірліктері және Сауд Арабиясы аумағына зымырандар мен дрондар ұшырып жатыр. Аймақтағы жағдай әлі де шиеленісті күйде қалып отыр.