Халықты мезі қылған автоқоңырауларға тыйым салынбақ

Қазақстанда жауапсыз қалған қоңырауларға автоматты түрде қайта қоңырау шалу функциясына тыйым салынуы мүмкін. Бұл туралы Мәжіліс депутаты Асхат Аймағамбетов мәлімдеді.

Оның айтуынша, байланыс қызметтерін көрсету қағидаларына тиісті өзгерістер енгізу жоспарланып отыр. Жаңа нормалар бойынша абоненттерге жіберілетін хабарламалар форматы қайта қаралады.

Вице-министр Досжан Мұсалиевтің сөзінше, енді пайдаланушыларға жауапсыз қоңыраулар туралы ақпарат тек қысқа мәтіндік хабарлама (SMS) арқылы жіберілуі мүмкін.

«Абоненттерге хабарламалар тек белгілі бір жағдайларда ғана жіберіледі», – деді ол.

Айта кетейік, 13 мамыр күні Мәжіліс отырысында автоматты қоңыраулар мәселесі көтерілген. Сол кезде цифрлық даму саласына жауапты министр Жаслан Мәдиев бұл функцияны қайта қарау мүмкін екенін айтқан.