Хакерлер Google деректеріне қол жеткізді: Бас прокуратура қазақстандықтарға ескерту жасады

Қазақстанның Бас прокуратурасы Google компаниясына жасалған хакерлік шабуылдан кейін қазақстандықтарға қауіп төніп тұрғанын мәлімдеді.

Ведомствоның хабарлауынша, ShinyHunters хакерлік тобы Gmail қызметінің деректеріне қол жеткізіп, 2,5 млрд-қа жуық аккаунттың ақпаратын иемденген.

«Шабуыл әлеуметтік инженерия әдісімен жүзеге асырылған. Хакерлер Google қызметкеріне қоңырау шалып, өздерін IT-қолдау мамандары ретінде таныстырған. Сөйтіп, оны зиянды Salesforce Data Loader қосымшасын авторизациялауға көндірген. Бұл ақау хакерлерге Google қызметкері атынан фишингтік және жалған қоңыраулар жасауға мүмкіндік береді», – делінген прокуратура хабарламасында.

Кейбір қолданушылар 650 кодымен басталатын нөмірлерден Gmail құпиясөзін өзгертуді талап еткен күдікті қоңыраулар алғанын хабарлаған.

Бас прокуратура деректерді қорғау үшін мына шараларды қабылдауға кеңес берді:

– құпиясөздерді шұғыл ауыстыру, әсіресе қарапайым және қайталанатындарын;

– екі факторлы аутентификацияны қосу немесе биометрия, PIN сияқты заманауи қорғау тәсілдерін пайдалану;

– өздерін Google деп таныстырған кез келген қоңыраулар мен хаттарға сенбеу, олардың 90%-ы алаяқтық;

– аккаунтқа қосылған қосымшалар мен байланыстарды тексеру және шектеу.

«Бұл оқиға ішінара жария деректердің өзі ауқымды алаяқтық схемаларға жол ашатынын көрсетеді. Сондықтан қолданушылар мен ұйымдарды қауіпсіздік шараларын қатаң сақтауға, аккаунт параметрлерін тұрақты тексеріп отыруға шақырамыз», – деп қосты Бас прокуратура.

Айта кетейік, Google компаниясы тамыз айында маусымда координацияланған кибершабуылға ұшырағанын растаған болатын.