Ғылыми жаңалық: Депрессия адамның эмоциясына ғана емес, көру қабілеті мен қозғалысына да әсер етеді

Депрессия - бұл жай ғана көңіл-күйдің түсуі емес, ми тіндеріндегі терең өзгерістерге әкелетін күрделі дерт. Nature Mental Health журналында жарияланған жаңа зерттеу бұл дерттің эмоционалдық жағдайға ғана емес, адамның көру және физикалық белсенділігіне де тікелей әсер ететінін дәлелдеді.

Джанин Д. Бийстербош бастаған ғалымдар тобы депрессияның ми құрылымына әсерін анықтау үшін 23 мыңнан астам ми магнито-резонанстық томография (МРТ) түсірілімін талдады. Мамандар 185-тен 11 мыңға дейін қатысушысы бар алты ірі деректер базасын жеке-жеке зерттеп, кейін ортақ нәтижелерді біріктірген. Нәтижесінде депрессияның ауырлық деңгейі мен тұлғалық тәуекелдердің ми функциясымен байланысы жан-жақты сарапталды.

Бұған дейінгі зерттеулер сияқты, бұл жолы да депрессияның эмоцияны реттеу, шешім қабылдау және уәждемеге жауап беретін маңдай, алдыңғы белдеушелік және аралық қыртыстардағы сұр зат көлемін азайтатыны расталды.

Дегенмен ғалымдарды таңғалдырғаны - дерттің деңгейі жоғары болған сайын, мидың қозғалыс (моторлы) және көру аймақтарының да көлемі кішірейетіні белгілі болды. Бұған дейін депрессия белгілері адамның көру қабілетімен немесе физикалық белсенділігімен бұлай тығыз байланыстырылмаған еді.

Ғалымдар ендігі кезекте мидың қозғалыс пен көруге жауапты бөліктеріндегі өзгерістердің депрессияның нақты қандай симптомдарына әсер ететінін тереңірек зерттеуді жоспарлап отыр. Бұл жаңалық болашақта ауруды ерте әрі дәл анықтауға және оны емдеудің жаңа тиімді әдістерін ойлап табуға жол ашады.