Грузияның экс-президенті Саакашвили сотталды

Тбилисидегі сот Грузияның бұрынғы президенті Михаил Саакашвилиге қатысты үкім шығарып, оны 9 жылға бас бостандығынан айырды, деп хабарлайды жергілікті БАҚ.

Саакашвилиге 2014 жылы айып тағылған. Бұл іс "пиджак ісі" деп аталады. Айыптаушы тараптың мәлімдеуінше, ол президенттік өкілеттігі кезінде мемлекеттік қаражатты жеке қажеттіліктеріне жұмсаған. Атап айтқанда, 9 миллион лари (шамамен 1,5 миллиард теңге) бюджет қаражатын ысырап етіп, қымбат сырт киімдер сатып алған, ұлының оқу ақысын төлеген және косметикалық процедураларға қаржы бөлген.

Бұл іс бойынша Мемлекеттік күзет қызметінің бұрынғы басшысы Темур Жанашия да айыпталды. Оған 300 мың лари (52,7 миллион теңге) көлемінде айыппұл салынды.

Михаил Саакашвили 2004-2013 жылдары қатарынан екі мерзім бойы Грузия президенті болды. 2013 жылы президенттік өкілеттігі аяқталған соң елден кетіп, кейін жаңа "Грузин арманы" үкіметі оған қарсы төрт қылмыстық іс қозғады. Осы істердің екеуі бойынша ол сырттай үш және алты жылға сотталды.