Грамы 62 мың теңге: Елімізде алтын неге қымбаттап жатыр және оған ақша салу тиімді ме?

Қазақстанда алтын бағасы тарихтағы ең жоғарғы деңгейге жетті. Ұлттық банктің дерегінше, бүгінгі күні 1 грамм алтынның құны 62 мың теңгеден асып отыр. Бұл көрсеткіш бір жыл ішінде бір жарым есе өскен. 31 арнаның хабарлауынша, тек соңғы аптада бағалы металл 6%-ға қымбаттаған, ал жылдық өсім 59%-дан асты.

Әлемдік нарықта да осындай жағдай байқалып отыр: троя унциясының бағасы 3700 долларға (шамамен 2 млн теңге) жақындады. Сарапшылар мұны ұлттық валюталардың құбылуымен байланыстырады, алайда қаржылық аналитиктер бағаның көтерілуін жаһандық нарықтағы жалпы тенденциялармен түсіндіреді.

"Қазақстандағы алтын бағасының қымбаттауы тікелей теңгенің құнсыздануымен байланысты емес. Бұл – халықаралық нарықтағы жағдайдың айнасы. Қазір алтынның унциясы 3650 доллар болды, алдағы уақытта 4000 долларға дейін өсуі мүмкін", – деді қаржы сарапшысы Арман Бейсембаев.

Бағаның өсуіне байланысты алтынға салым салу халық арасында жиі талқыланып жүр. Инвестициялық монеталар мен құймаларға сұраныс артқан. Алтын пайыздық табыс әкелмесе де, белгісіздік кезеңінде сенімді құрал ретінде қарастырылады. Дегенмен экономист Ерасыл Серікбай жинақтың бәрін тек алтынға салу қауіпті екенін ескертеді.

"Негізгі қауіп – қысқа мерзімді құбылмалылық. Сондықтан алтын ұзақмерзімді инвестиция үшін қолайлы. Қазір қаржы салуға болатын көптеген құралдар бар: депозиттер, активтер, алтын, жылжымайтын мүлік, бағалы қағаздар", – дейді ол.

Investing.com дерегінше, Қазақстандағы алтын бағасының өсуі әлемдік динамикадан 46%-ға асып түскен. Сарапшылардың пікірінше, жаһандық геосаяси шиеленістер, макроэкономикалық тәуекелдер және Дональд Трамптың саясаты аясында доллар тұрақтылығына деген сенімнің төмендеуі алдағы уақытта да алтынға деген сұранысты арттыра бермек.