Германияда Қазақстан азаматы Ресей пайдасына тыңшылық жасады деген күдікке ілікті

Берлинде қылмыстық полиция қызметкерлері Қазақстан азаматын Ресей пайдасына тыңшылық жасады деген күдікпен ұстады, деп хабарлады «Настоящее Время» телеарнасы Германияның Бас прокуратурасына сілтеме жасап.

Күдіктінің толық аты-жөні жарияланған жоқ, құжаттарда ол Сергей К. деп көрсетілген. Сот 29 сәуірде оған қатысты бұлтартпау шарасын қарайды.

Тергеу нұсқасына сәйкес, күдікті кемінде 2025 жылдың мамыр айынан бері Ресейдің арнайы қызметтерімен байланыста болған және оларға ақпарат беріп отырған. Атап айтқанда, Германияның Украинаға көрсетіп жатқан әскери көмегі мен қорғаныс өнеркәсібінің жағдайына қатысты мәліметтер туралы сөз болып отыр. Тергеушілердің мәліметінше, әсіресе ұшқышсыз аппараттар мен робот техникасын өндіретін компаниялар туралы деректер қызығушылық тудырған.

Сондай-ақ күдікті автожолдарда әскери колонналарды, соның ішінде НАТО елдерінің керуендерін және Берлиндегі мемлекеттік ғимараттарды суретке түсірген деген болжам бар. Бұдан бөлек, ол барлау өкілдеріне диверсия жасауға қолайлы нысандар туралы ақпарат беріп, мұндай топқа адамдар тартуды ұсынғаны айтылып отыр.

Күдіктінің пәтерінде және тағы бір адамның үйінде тінту жүргізілген. Алайда екінші адам іс бойынша күдікті ретінде қарастырылмайды. Тергеу жалғасып жатыр.