Газадағы соғысқа қатысқан болуы мүмкін: Израиль армиясында 189 қазақстандық жүр

Al Jazeera телеарнасының зерттеуіне сәйкес, Израиль қорғаныс армиясында (ЦАХАЛ) қос азаматтығы бар 189 қазақстандық қызмет етеді. Мәліметтер бойынша, олардың бір бөлігі Газа секторындағы соғыс қимылдарына қатысқан болуы мүмкін.

Израиль армиясында шетелдік паспорты бар барлығы 50 мыңнан астам адам қызмет етеді. Олардың басым бөлігі АҚШ, Франция және Ресей азаматтары. Сонымен қатар тізімде Орталық Азия мен көршілес елдердің де азаматтары бар:

• Өзбекстан — 264 адам;

• Әзірбайжан — 146 адам;

• Түркия — 112 адам;

• Қазақстан — 189 адам;

• Қырғызстан — 52 адам;

• Түрікменстан — 31 адам.

Қос азаматтық және заң алдындағы жауапкершілік

Бұл ақпарат Қазақстанның құқықтық талаптары тұрғысынан бірнеше күрделі мәселені тудырады. Біріншіден, Қазақстан Конституциясына сәйкес, елімізде қос азаматтыққа тыйым салынған. Басқа елдің азаматтығын алған сәтте Қазақстан азаматтығы автоматты түрде жойылуы тиіс.

Екіншіден, Қазақстан заңнамасында шетелдегі соғыстарға қатысқаны үшін қатаң жаза қарастырылған:

1. Қылмыстық кодекстің 172-бабы: Ел аумағынан тыс жердегі қарулы қақтығыстарға қатысқаны үшін 5 жылдан 9 жылға дейін бас бостандығынан айыру жазасы белгіленген.

2. Жалдамалылық (170-бап): Егер адамның ақша үшін соғысқаны дәлелденсе, мүлкі тәркіленіп, 7 жылдан 12 жылға дейін түрмеге жабылуы мүмкін. Ал ауыр салдарларға әкеп соқса, 20 жылға дейін бас бостандығынан айыру немесе азаматтықтан айыру жазасы қолданылады.

Әзірге Қазақстанның ресми органдары (СІМ немесе ІІМ) Al Jazeera жариялаған бұл тізімге қатысты нақты түсініктеме берген жоқ.