Ғасырға жуық тарихы бар нысандар жаңарды: Шығыс Қазақстанда екі вокзал іске қосылды

Шығыс Қазақстан облысында өткен ғасырдың 30-жылдарынан бері күрделі жөндеу көрмеген Риддер және Шемонаиха теміржол вокзалдары ауқымды қайта құрудан кейін ресми түрде есігін айқара ашты. Мемлекет басшысы мен Үкіметтің тікелей тапсырмасы аясында жүзеге асқан бұл жоба өңірдегі көлік инфрақұрылымының сапасын жаңа деңгейге көтерді, деп хабарлайды Қазақстан темір жолы» ҰК» АҚ баспасөз қызметі.

Ұзақ жылдар бойы ескірген ғимараттар толықтай трансформацияланды: мамандар тірек конструкцияларын күшейтіп, шатыры мен инженерлік желілерін жаңартты. Сонымен қатар, жолаушылар платформалары заманауи үлгіге келтіріліп, вокзал маңы абаттандырылды. Енді жолаушылар жаңа жиһаздармен және озық жабдықтармен қамтылған жайлы залдарда күте алады.

Қауіпсіздік пен инклюзивтілік – басты назарда

Жаңартылған нысандарда ерекше қажеттіліктері бар жандар үшін барлық жағдай жасалған: пандустар, тактильді тақтайшалар орнатылып, өрт қауіпсіздігіне сай қосымша эвакуациялық шығу жолдары салынған.

• Шемонаиха вокзалы (1936 жылы салынған): Қайта құрудан кейін ауданы 229 шаршы метрге жетті. Ол Қазақстан мен Ресей бағытындағы екі бірдей жолаушылар пойызына қызмет көрсетеді.
  
  

• Риддер вокзалы (1938 жылы салынған): Жаңарту жұмыстарынан кейін аумағы 470 шаршы метрді құрады. Бүгінде вокзал Өскемен мен Ресей Федерациясына қатынайтын төрт пойыздың жолаушыларын қабылдауда.

«Қазақстан темір жолы» ҰК» АҚ баспасөз қызметінің хабарлауынша, елдегі теміржол вокзалдарын заманауи талаптарға сай жаңғырту бағдарламасы республиканың басқа да өңірлерінде қарқынды жалғаспақ.