Ғалымдар жасанды интеллектіні 15 минуттан артық үзіліссіз пайдаланбауға кеңес береді

Ғалымдар жасанды интеллект көмекшілеріне шамадан тыс тәуелділіктің адамның дербес ойлау жүйесіне кері әсерін тигізетінін анықтады.

Карнеги-Меллон, Массачусетс технологиялық институты (MIT), Оксфорд және Лос-Анджелестегі Калифорния университетінің (UCLA) зерттеушілері бірлескен тәжірибе жүргізді. Зерттеу нәтижелері туралы беделді WIRED ғылыми-танымал басылымы хабарлады.

Ғылыми эксперимент шеңберінде қатысушылар екі топқа бөлініп, логикалық, математикалық және мәтіндік тапсырмаларды орындады. Бірінші топ тапсырмаларды шешуде жасанды интеллект (ЖИ) құралдарының көмегіне жүгінсе, екінші топ зерттеуді дербес жүргізді. Сынақ нәтижесі көрсеткендей, ЖИ-көмекшілерді пайдаланған қатысушылар технологиялық қолдау тоқтатылғаннан кейін тапсырмаларды орындау сапасын айтарлықтай төмендеткен. Ғалымдар бұл құбылысты нейрожелілермен 10–15 минут жұмыс істегеннен кейін-ақ байқауға болатынын алға тартады.

Мамандар бұл процесті «когнитивті аутсорсинг» деп сипаттады. Бұл — тұлғаның аналитикалық талдау және ақпарат іздеу функцияларын толықтай алгоритмдерге жүктеу үрдісі. Тұрақты когнитивті аутсорсинг болашақта мынадай теріс салдарға әкелуі мүмкін:

 Жедел және ұзақ мерзімді жадының (естің) нашарлауы;

 Когнитивті зейін мен концентрация деңгейінің төмендеуі;

 Сыни ойлау және дербес шешім қабылдау дағдыларының әлсіреуі.

Сонымен қатар зерттеу авторлары заманауи технологиялардан бас тарту міндетті емес екенін атап өтті. Жасанды интеллект жүйелері өндірістік және білім беру процестерінде тиімді құрал бола алады, алайда ол адамның интеллектуалды еңбегін толық алмастырмай, тек қосымша көмекші функцияны атқаруы тиіс.