Футболдан Қазақстан құрамасы Лихтенштейнді жеңіп, 12 жылдық жеңіліс сериясын үзді

Футболдан Қазақстан ұлттық құрамасы 2026 жылғы әлем чемпионаты іріктеу кезеңіндегі екінші ойында Лихтенштейн командасын 2:0 есебімен жеңді.

Матч басталған сәттен Қазақстан құрамасы шабуылға жиі шығып, басымдықты қолға алуға ұмтылды. Алайда алаң иелері лайықты қарсылық көрсетіп, ара-тұра қауіпті сәттер ұйымдастырып отырды.

Ойынның 42-минутында шабуылшы Максим Самородов әріптесі Марат Быстровтың берген добын қақпаға дәл бағыттап, есепті ашты. Үш минуттан соң Самородов тағы бір әдемі пас шығарып, Александр Марочкин есепті еселеді. Айта кетерлігі, Марочкин ұлттық құрама сапындағы 50-матчында алғашқы голын соқты.

Екінші таймда қазақстандық футболшылар ойын тізгінін толықтай өз қолына алғанымен, есеп өзгерген жоқ.

Бұл жеңіс арқылы Қазақстан құрамасы әлем чемпионатының іріктеу кезеңіндегі 12 жылға созылған жеңіссіз сериясын тоқтатты. Ұлттық құрама соңғы рет 2013 жылдың қыркүйегінде Фарер аралдарын (2:1) ұтқан болатын. Содан бері команда 22 ойын өткізіп, 7 рет тең ойнап, 15 матчта жеңіліске ұшырады.

Енді Қазақстан құрамасы келесі кездесуін 9 маусымда өз алаңында Солтүстік Македонияға қарсы өткізеді.