Футболдан Еуропа чемпионатына 9 күн қалды: Фавориттер кім?

9 күннен кейін әлем көз тіккен футбол додасы басталады. Биыл Еуропа чемпионаты осынау біріншіліктің үш дүркін жеңімпазы Германия жерінде өткелі отыр. 

Бір айға созылатын жарыс 14 маусымда басталып, 14 шілдеде аяқталады. Топтық кезең 26 маусымға дейін жалғасып, плей-офф кезеңі 29 маусымда басталады деп жоспарланған. Чемпионатты алаң иесі саналатын Германия Шотландияға қарсы ойынмен ашатын болады.

Чемпионатқа қандай құрамалар іріктелді?

А тобы: Германия, Шотландия, Венгрия, Швейцария
B тобы: Испания, Хорватия, Италия, Албания
C тобы: Словения, Дания, Сербия, Англия
D тобы: Польша, Нидерланды, Аустрия, Франция
E тобы: Бельгия, Словакия, Румыния, Украина
F тобы: Түркия, Грузия, Португалия, Чехия

Чемпионат форматы EURO 2020-дағыдай болады. Әр топтан жоғары ұпай жинаған екі құрама және тобында үшінші орынға тұрақтағандардың ішінен нәтижесі жақсырақ болған төрт құрама 1/8 финалға жолдама алады.

Ойындар келесі қалаларда өтпек:

1. Берлин: Olympiastadion Berlin (қазіргі сыйымдылығы: 71,000)
2. Мюнхен: Munich Football Arena (66,000)
3. Дортмунд: BVB Stadion Dortmund (62,000)
4. Штутгарт: Stuttgart Arena (51,000)
5. Гамбург: Volksparkstadion Hamburg (49,000)
6. Лейпциг: Leipzig Stadium (40,000)
7. Гельзенкирхен: Arena AufSchalke (50,000)
8. Кельн: Cologne Stadium (43,000)
9. Франкфурт: Frankfurt Arena (47,000)
10. Дюссельдорф: Düsseldorf Arena (47,000)

Кімнің Еуропа чемпионы атанатыны 14 шілдеде Берлиндегі Olympiastadion Berlin стадионында анықталады.

Турнир фавориттері кім?

Еуродағы ең жұлдызды құрама – Англия

Бұл құрама Еуропаның алдыңғы қатарлы клубтарында ойнайтын үздік ойыншылардан жасақталған. "Алтын допқа" үміткер Джуд Беллингем мен Хәрри Кейнге Кайл Уолкер, Фил Фоден, Букайо Сака, Деклан Райс, Коул Палмер секілді серпінді ойыншыларды қосыңыз. Алайда чемпионатты ұту үшін жұлдызды құрамның болуы жеткіліксіз.

Ол үшін бас бапкер Гарет Саутгейт жұлдыз ойыншылардың эгосына төтеп беріп, әлеуетін аша алуы керек. Себебі ол өткен Еурода Англияны финалға шығарғанымен, ұтқыр тактикалық шешімдердің жетіспеушілігінен сынға да ұшыраған.

Еуропадағы ең тұрақты құрама – Франция

Еуропадағы ең тұрақты ұлттық құрама болуымен қатар, Франция Килиан Мбаппе, Антуан Гризманн, Майк Майньян, Уильям Салиба, ағайынды Эрнандес, Аурелиан Чуамени және Осман Дембеле сияқты мықты ойыншылардың арсеналына ие.

Әлемдегі ең қауіпті ойыншы - Мбаппенің айналасында стратегиялық ойындарды жасай алса, Францияның турнирлік сапары ұзаққа созылуы мүмкін. Сонымен қатар Гризманн да 2022 жылғы әлем чемпионатында көрсеткен деңгейін тапса, басқа командаларға француздарды жеңу қиынға соқпақ.

Францияның 2016 жылдан бері 4 ірі турнирдің 3-еуінде ақтық мәреге жетуі таңғаларлық. Соңғы Еурода Швейцариядан 1/8 финалда жеңілгені ғана олардың беделіне нұқсан келтірді. 

Алаң иесі – Германия

Германия соңғы екі Әлем чемпионатында топтық кезеңнен шыға алмай, дағдарысқа тап болған еді. Бірақ биылғы наурыз айындағы Франция мен Нидерландыға қарсы жолдастық кездесулерде жеңіске жетуі жағдайдың дұрысталғанынан хабар бергендей.

Жамал Мусиала мен Флориан Уирцтің қосылуы, Тони Кроостың қайта оралуы да құрамаға жаңа серпін берері сөзсіз. Сондай-ақ алаң иелері ретінде жанкүйерлерін қуантуға тырысып бағады.

Роналду бастаған Португалия

Криштиану 39 жасқа келіп, Сауд Арабия лигасында голдарды тоғытып жүргенімен, оны Еуродағы Португалияның басты тұмары деу қиындау. Себебі көптеген маман Португалия Роналдусыз жақсырақ ойын өрнегін көрсетеді деп сенеді. Алайда аңызға айналған ойыншыны негізгі құрамға қоспау бас бапкер Роберто Мартинезтің қолынан келе ме екен?

Португалия Рубен Диаш, Бернарду Сильва, Жоау Фелиш, Жоау Канселу, Бруно Фернандеш, Диего Жота, Рафаель Леао секілді дарынды ойыншыларға ие. Өз тобынан бірінші боп шығып, жоқ дегенде 1/8 финалға жетуге әлеуеті жетеді.

Испания да жасындай жалындаған жас дарындардан құр алақан емес. Бельгия да Еден Азар мансабын аяқтаса да, 13 ойын қатарынан жеңілмей келеді. Чемпиондық атақты қорғап қалуға тырысатын Италияны да ұмытпаған жөн.

Еуро тарихында аутсайдер саналған құрамалардың өзгелерден оза шапқан кездері де аз емес. Оған 2004 жылы чемпион болған Грекия мен 1992 жылы чемпион атанған Дания дәлел. 2016 жылы Англияны қапыда қалдырып, ширек финалға жеткен Ирландияны да айтпасқа болмас.

Не де болса, құрлықтың үздік құрамалары футболсүйер қауымға бір ай бойы тартысты ойындар мен қуанышты сәттер сыйлайтыны анық.