Футболдан әскерге: Николя Тидің тосын шешімі

Николя Ти көпшілікке танымал болмаса да, футбол әлемінде болашағы бар қақпашылардың бірі болған. 24 жасында кәсіби мансабын аяқтап, Франция әскерінің 1-парашютті гусарлар полкына қосылғаны жұртты таң қалдырды.

«Футболға деген құштарлығым сөне бастады»

Николя Ти футбол жолын ерте бастаған. 13 жасында Франциядан Лондонға жол тартып, ағылшынның әйгілі «Челси» клубының академиясына қабылданды. Ол кезде сарапшылар оны Франциядағы ең үздік жас қақпашылардың бірі деп бағалаған еді. Алайда кәсіби деңгейде үлкен жетістікке жете алмады, ол «Челси» сапында бірде-бір ойын өткізбеген.

2020 жылы Португалияның «Витория Гимарайнш» клубына ауысып, онда тек қосалқы (B) құрамда екі-ақ матчқа шыққан. «Футболға деген құштарлығым сөне бастады. Әскери қызмет мені бұрыннан қызықтыратын. Өзіме: “Неге әскерге бармасқа?” - деп айттым», - дейді ол.

«Достарыма деген қызғаныш болды»

Ти кәсіби футболшы болуды ешқашан армандамағанын жасырмайды: «Барлығы кездейсоқ болды, сәттілік жолдасым болды». Сонымен қатар, Францияда бірге өскен достары - Софьян Диоп, Бенуа Бадиашиль, Лоран Ассиньон сынды таланттар Лига 1-де өнер көрсетіп жатқанда, өзін салыстырудан қашып құтыла алмаған.

«Олардың дебюттерін көргенде, ішімде қызғаныш пайда болды. Мен де сол деңгейде ойнағым келді. Бірақ Чемпионшиптегі клубтарға бірнеше айға жалға берілгім келмеді», - дейді бұрынғы қақпашы.

Жетістіктері мен жаңа өмірі

Футболдағы қысқа мансабына қарамастан, Ти бірқатар маңызды турнирлерге қатысқан. Ол 2018 жылы УЕФА Жасөспірімдер лигасын жеңіп алды. Сондай-ақ, Кот-д’Ивуар жастар құрамасының сапында Токио Олимпиадасының ширек финалына дейін жеткен.

Бүгінде ол әскери форма киіп, Францияның элиталық 1-парашютті гусарлар полкында қызмет етіп жүр. Бұл – Франция армиясының әуе-десанттық (парашютті) әскерінің құрамындағы барлау және шабуылға арналған элиталық бөлімше. Ол жеңіл кавалерияның тарихи дәстүрлерін сақтай отырып, қазіргі заманғы десанттық міндеттерді орындайды.

Әлеуметтік желілерде бұл шешімі қолдау тауып, батыл қадам ретінде бағаланды.

Автор: Әмір Жәнібек