Футболдан әлем чемпионатының жеребесі қайда, қашан өтетіні белгілі болды

2026 жылы өтетін футболдан әлем чемпионатының жеребесі 5 желтоқсанда АҚШ-тың Лас-Вегас қаласында өтеді. Бұл туралы ESPN өз дереккөздеріне сілтеме жасап хабарлады.

АҚШ, Канада және Мексикада бірлесіп ұйымдастырылатын жаһандық дода 48 құраманың қатысуымен өтпек. Дегенмен жеребе тарту рәсімін өткізуге Канада мен Мексиканың қалалары таңдалмай, шешім Лас-Вегасқа тоқтаған.

Мексикалық «Пачука» клубының атқарушы директоры Педро Седильо ESPN тілшісіне берген сұхбатында жеребе салу рәсімі 5 желтоқсанға жоспарланғанын растады. Ол Лас-Вегаста Мексиканың Пачука қаласы мен Идальго штаты туралы ақпарат ұсыну мақсатында болатынын айтты.

Айта кетейік, АҚШ соңғы рет әлем чемпионатын 1994 жылы қабылдаған. Сол жылы да жеребе салу рәсімі Лас-Вегас конференц-орталығында өткен еді. Алайда биылғы 5 желтоқсан күні аталған орталық пен басқа да бірнеше нысан толық брондалған.

17 500 адамдық сыйымдылығы бар және 54 мың шаршы метрлік экраны бар әйгілі The Sphere аренасы жаңа ықтимал орын ретінде аталған. Ол да бос болмайтыны анықталды. Жеребенің нақты қай орында өтетіні әзірге белгісіз, бірақ қала ретінде Лас-Вегас ресми түрде таңдалып отыр.