Футболдан әлем чемпионаты: матчтар 2,5 сағатқа дейін созылуы мүмкін

2026 жылғы футболдан әлем чемпионаты аясындағы кейбір ойын АҚШ-тағы экстремалды ауа райы салдарынан 2,5 сағатқа дейін ұзаруы ықтимал. Бұл туралы The Touchline басылымы хабарлады.

Дереккөз мәліметінше, матчтардың созылуына аптап ыстық, жоғары ылғалдылық, ойыншыларға арналған қосымша салқындату үзілістері, сондай-ақ найзағай мен күн күркіреуі кезіндегі міндетті тоқтатулар себеп болуы мүмкін. Бұған дейін АҚШ-та өткен клубтар арасындағы әлем чемпионаты кезінде де осындай жағдайлар тіркелген.

Турнирдің алғашқы аптасында елдің шығыс өңірлерінде өткен төрт матч ауа райына байланысты уақытша тоқтатылған. Дауыл мен найзағай қаупіне байланысты үзілістер 40 минуттан 130 минутқа дейін созылған.

АҚШ-та қолданыстағы қауіпсіздік хаттамасы Ұлттық ауа райы қызметінің талаптарына негізделген. Егер стадионнан 16 шақырым радиуста найзағай анықталса, ойын автоматты түрде тоқтатылады. Бұл кезде футболшылар мен жанкүйерлер ашық аумақтан кетіп, жабық немесе жерасты бөліктеріне паналауы тиіс. Бұл талап барлық спорт түріне міндетті.

Мамандардың айтуынша, жазғы кезеңде Флорида мен Техас штаттарындағы ыстық әрі ылғалды климат матчтарға әсер етуі мүмкін. Сонымен қатар климаттың өзгеруі салдарынан найзағай жиілігі артуы ықтимал екені айтылуда.

Айта кетейік, 2026 жылғы әлем чемпионаты 11 маусым мен 19 шілде аралығында АҚШ, Мексика және Канадада өтеді.