Футбол сатылмайды: ФИФА даулы жобадан бас тартты

ФИФА президенті Джанни Инфантино әлем чемпионаты мен ұйымның өзге жарыстарының коммерциялық қызметіне жеке инвесторларды тарту жоспарынан бас тартты. Ол бастама футбол қауымдастығын бөліп-жарғанын айтып, жобаның жүзеге асырылмайтынын мәлімдеді. 

ФИФА FIFA Forward Enterprise атты еншілес кәсіпорын құрып, оған хабар тарату, демеушілік, билет сату, тауарлық белгі мен жарыстарды өткізу қызметін біріктіруді жоспарлаған. Құны 20 миллиард долларға бағаланған кәсіпорынның 20 пайызға дейінгі басқару құқығын бермейтін үлесін сату арқылы 4,2 миллиард доллар тарту көзделді. 

Жобаға УЕФА, Азия футбол конфедерациясы және Солтүстік, Орталық Америка мен Кариб аймағының футбол конфедерациясы қарсы шықты. Бұл үш ұйымға ФИФА құрамындағы 211 ұлттық қауымдастықтың 143-і мүше. УЕФА ұсыныс кері қайтарылғанға дейін ФИФА жарыстарына қатыспау туралы шешім қабылдаған еді. 

Инвесторлар тобын Джошуа Кушнер негізін қалаған Thrive Capital компаниясының Thrive Eternal қоры басқаруы мүмкін болған. Джошуа Кушнер — АҚШ президенті Дональд Трамптың күйеу баласы Джаред Кушнердің інісі. Трамп бұл ұсынысты Инфантиномен талқыламағанын мәлімдеді. 

УЕФА ФИФА-ның жобадан бас тартуын құптағанымен, Инфантино басқаратын ұйымға деген сенім әлсірегенін мәлімдеді. Еуропалық футбол ұйымы мұндай бастамалардың алдағы уақытта ашық талқылаусыз қабылдануына жол бермеу үшін ФИФА-ның басқару тәртібін қайта қарауға шақырды.