FT: Трамп Украинадағы соғысты тоқтатуға қызығушылығын жоғалтып жатыр

АҚШ-тың Ресей мен Украина арасындағы соғысты бейбіт жолмен реттеуге делдал болу әрекеті тоқырауға ұшырады. Бұған АҚШ президенті Дональд Трамптың келіссөздерге қызығушылығының төмендеуі себеп болуы мүмкін. Бұл туралы шенеуніктер мен дипломаттар Financial Times басылымына мәлімдеді.

Басылымның жазуынша, Вашингтонның назарын Украинадан басқа бағытқа бұрған негізгі себептердің бірі — АҚШ пен Израильдің Иранға қарсы әскери операциясы. Соның салдарынан АҚШ-тың сыртқы саясаттағы басымдықтары өзгерген.

Еуропалық дипломаттардың айтуынша, өткен аптада америкалық шенеуніктер Еуроодақтағы әріптестеріне Ресейдің мұнай саласына қарсы санкцияларды күшейту жоспарланбағанын хабарлаған.

Ресей президентінің баспасөз хатшысы Дмитрий Песков келіссөздерде үзіліс бар екенін растады.

«Келіссөздерде шынымен де кідіріс бар. Америкалықтардың басқа басымдықтары бар, бұл түсінікті», — деді ол Financial Times басылымына.

Еуропалық дипломаттардың бірі АҚШ назарын Таяу Шығысқа бұруды Еуроодақ пен Украина үшін «апат» деп атаған. Сонымен қатар Еуропа елдеріне Украинаға арналған америкалық қару жеткізілімінің, әсіресе әуе қорғанысы жүйелерінің кешіктірілетіні туралы хабарлама түскені айтылды.

Еске салсақ, Ресей, Украина және АҚШ арасындағы келіссөздердің алғашқы раундтары 23–24 қаңтарда және 4–5 ақпанда Біріккен Араб Әмірліктерінде өткен. Үшінші кездесу 17–18 ақпанда Швейцарияда ұйымдастырылған. Келесі кездесу наурыздың басында жоспарланғанымен, Таяу Шығыстағы әскери қақтығыстар оған кедергі келтірген.

Сонымен қатар басылым дерегіне сәйкес, Ресей президентінің көмекшісі Юрий Ушаков француз өкілдерінің Еуроодақты келіссөздерге қатыстыру туралы ұсынысын қабылдамай тастаған.

Ал Дональд Трамп NBC News арнасына берген сұхбатында бейбіт келісімге келуге Украина президенті Владимир Зеленскийдің ұстанымы кедергі келтіріп отырғанын айтты.

«Мен Зеленскийдің келісім жасағысы келмейтініне таңғаламын. Зеленскийге келісім жасау керек екенін айтыңыздар, өйткені Путин келісімге дайын. Зеленскиймен келісу әлдеқайда қиын», — деді Трамп.

Ол сондай-ақ Ресей мұнайына қатысты санкциялардың уақытша әлсіреуі Ормуз бұғазының жабылуына байланысты туындаған энергетикалық дағдарыспен байланысты екенін айтты.

Трамптың айтуынша, дағдарыс аяқталғаннан кейін санкциялар қайта енгізілуі мүмкін. Сонымен бірге ол Иран келісім жасауға дайын екенін айтқанымен, қазіргі уақытта Вашингтон Тегеранмен келісімге келуді жоспарлап отырмағанын жеткізді.

Айта кетейік, 28 ақпанда АҚШ пен Израиль Иранға қарсы әскери операция бастаған. Шабуылдар нәтижесінде Иранның жоғарғы көшбасшысы аятолла Әли Хаменеи қаза тапқаны хабарланған. Бұған жауап ретінде Иран Израильге соққы жасап, Парсы шығанағындағы АҚШ базалары мен оның одақтастарының инфрақұрылымына шабуылдар жасауда.

Қазіргі уақытта Ормуз бұғазы арқылы өтетін теңіз жолдарына қауіп төнген. Бұл бағыт Таяу Шығыстан мұнай мен газ жеткізудің негізгі маршруттарының бірі саналады. Осы жағдай аясында Brent маркалы мұнай бағасы барреліне 100 доллардан жоғары көтерілген.