Франция мен Англия әлем чемпионатының қола жүлдесін сарапқа салады

19 шілдеге қараған түні футболдан 2026 жылғы әлем чемпионатының үшінші орын үшін матчы өтеді. АҚШ-тың Майами-Гарденс қаласындағы стадионда Франция мен Англия құрамалары кездеседі. Ойын Қазақстан уақытымен сағат 02:00-де басталады.

Кездесуді «Qazaqstan» және «Qazsport» телеарналары тікелей көрсетеді. Екі арнадағы көрсетілім сағат 01:50-де басталады. «Qazsport» арнасында Майамиден арнайы бағдарлама сағат 01:20-да, ал «Qazaqstan» арнасында әлем чемпионатына шолу сағат 01:30-да эфирге шығады.

Франция жартылай финалда Испаниядан 0:2 есебімен жеңілді. Дидье Дешамның шәкірттері бұған дейін Швеция, Парагвай және Марокко құрамаларын жарыстан шығарған. Англия екінші жартылай финалда Аргентинаға 1:2 есебімен есе жіберді. Ағылшындар плей-офф кезеңінде Конго Демократиялық Республикасын, Мексика мен Норвегияны жеңген.

«Менің ойыншыларымның да, француз футболшыларының да бұл кездесуде ойнағысы келмейді. Олар финалда өнер көрсеткісі келген. Біз шешуші ойынға шығу үшін бар күшімізді салдық», – деді Англия құрамасының бас бапкері Томас Тухель.

Бұл кездесу Дидье Дешамның Франция құрамасының бас бапкері ретіндегі соңғы ойыны болмақ. Ол ұлттық құраманы 14 жыл басқарды. Дешамның жетекшілігімен Франция 2018 жылы әлем чемпионы атанып, 2022 жылы финалға жетті және қатарынан үш әлем чемпионатының жартылай финалында ойнады.

Франция капитаны Килиан Мбаппе турнирдің үздік сұрмергеніне берілетін «Алтын бутсы» жүлдесіне таласып жатыр. Оның еншісінде сегіз гол бар. Аргентина шабуылшысы Лионель Месси де сегіз рет мергендік танытқан, алайда нәтижелі пастары көбірек болғандықтан көш бастап тұр.

Англия бұған дейін үшінші орын үшін екі рет ойнап, екі кездесуде де жеңілген. 1990 жылы Италиядан 1:2, ал 2018 жылы Бельгиядан 0:2 есебімен ұтылды. Франция 1958 және 1986 жылдары қола жүлде иеленген.