Франция Қазақстанға АЭС салуда қолдау көрсетуге дайын – Энергетика министрлігі

4-6 желтоқсан аралығында Қазақстан делегациясы Энергетика министрі Алмасадам Сәтқалиевтің басшылығымен жұмыс сапарымен Францияға барып, бірқатар кездесу өткізді. Делегация Францияның сыртқы сауда және шетелдегі азаматтар істері бойынша министрімен, энергетика мәселелері жөніндегі министрімен, Францияның энергетика және климат жөніндегі директормен кездесті. Сондай-ақ Францияның атом саласының жетекші ұйымдарымен келіссөздер жүргізді.

ҚР Энергетика министрлігінің баспасөз қызметінің мәліметінше, келіссөздер ірі энергетикалық компания және атом электр станцияларының операторы EDF, АЭС жабдықтарын әзірлеуші және өндіруші Framatome, сондай-ақ АЭС үшін турбиналық жабдық жеткізуші Arabelle Solutions компанияларымен өтті.

Қазақстандық делегация күрделі инфрақұрылымдық нысандарға, оның ішінде атом электр станцияларына арналған инжинирингтік қызметтер мен цифрлық шешімдер бойынша маманданған халықаралық консалтингтік компания Assystem өкілдерімен кездесті. Делегация радиациялық қорғаныс және ядролық қауіпсіздік институтының (IRSN) дағдарыс орталығы мен АЭС жабдықтарын өндіру зауытын аралады.

«Француз тарапы Қазақстанда атом электр станциясын салу жобасын жүзеге асыруға қолдау көрсетуге дайын екендігін білдірді», – деп хабарлады Энергетика министрлігі.