Forbes Kazakhstan ең бай кәсіпкерлер тізімін жаңартты: жаңа миллиардерлер пайда болды

Forbes Kazakhstan Қазақстанның ең бай кәсіпкерлерінің жаңартылған рейтингін жариялады. 2026 жылы тізімдегі кәсіпкерлердің жиынтық байлығы 60,84 млрд долларға жетіп, өткен жылмен салыстырғанда артты.

Биылғы басты өзгеріс – миллиардерлер қатарының кеңеюі. Атап айтқанда, Astana Motors негізін қалаушы Нұрлан Смағұлов (1,3 млрд доллар) пен BI Group акционері Айдын Рахымбаев (1,1 млрд доллар) алғаш рет жаһандық Forbes миллиардерлер тізіміне енді. Екеуі де капиталын шикізаттық емес секторда – автоөнеркәсіп пен құрылыс саласында жинаған.

Жаңа тізімнің көшбасшысы болып үшінші жыл қатарынан Kaspi.kz акционері Вячеслав Ким танылды, оның байлығы 7,8 млрд долларға бағаланған. Екінші орынға 5,9 млрд доллар капиталымен KAZ Minerals тобының негізгі акционері Владимир Ким көтерілді. Үшінші орынды әрқайсысы 5,4 млрд долларға иелік ететін Тимур Құлыбаев, Динара Құлыбаева және Болат Өтемұратов өзара бөлісті.

Ал өткен жылы екінші орында болған Freedom Holding Corp. басшысы Тимур Турлов биыл алтыншы сатыға төмендеді. Басылымның бағалауынша, оның қазіргі жағдайы 5,2 млрд долларды құрайды, бұл бір жыл бұрынғы көрсеткіштен 600 млн долларға аз.

Тізімде жаңа есімдер де бар. Олардың қатарында Шахмұрат Мүтәліп, Владимир Сытник, Айғазы Құсайынов, Бекжан Мамыт, Юрий Цхай және Бахтияр Оспанов бар. Ең жас қатысушы – 35 жастағы Мүтәліп. Ол құрылыс және инфрақұрылым жобаларына инвестиция салып келеді.

Рейтингтің жаңаруына ірі мәмілелер де әсер еткен. Мәселен, «Қазақмыс» корпорациясы Нұрлан Артықбаев бақылауына өткен. Сонымен қатар телеком және алтын өндіру салаларында да активтерді қайта бөлу үдерісі жүріп жатыр.

Сарапшылардың бағалауынша, Қазақстанда капиталдың қайта бөлінуі жалғасып, жаңа ірі мәмілелер жақын уақытта жүзеге асуы мүмкін.