FlyArystan қол жүгіне қатысты талаптарды жеңілдетті

Отандық FlyArystan лоукостері 2026 жылдың 1 наурызынан бастап тегін тасымалданатын қол жүгінің нормасын өзгертеді. Жаңа ережеге сәйкес, жолаушылар бұрынғы 5 келінің орнына салмағы 7 келіге дейінгі қол жүгін өзімен бірге тегін алып жүре алады.

Әуе компаниясының мәліметінше, қол жүгінің рұқсат етілген габариттері өзгеріссіз қалады - 56×23×36 см. Бұл шешім жолаушылар сұранысын, нарықтық конъюнктураны және халықаралық авиатасымал тәжірибесін кешенді түрде талдау нәтижесінде қабылданған.

Жаңа талаптар 2026 жылдың 1 наурызынан бастап орындалатын барлық рейстерге қатысты болады. Айта кетерлігі, билеттің қашан сатып алынғаны маңызды емес, бастысы — ұшу күні белгіленген мерзімнен кеш болмауы тиіс. Ал 2026 жылдың 28 ақпанына дейін (қоса алғанда) орындалатын рейстерде бұрынғы 5 келілік норма сақталады.

Авиакомпания «one-piece concept» (бір орын) қағидасын әрі қарай да ұстанатынын хабарлады. Бұл дегеніміз - жолаушыға белгіленген салмақ пен өлшемге сәйкес келетін тек бір дана қол жүгін ғана кабинаға алып кіруге рұқсат етіледі. 2024-2025 жылдардағы статистика көрсеткендей, FlyArystan жолаушыларының төрттен үші тек минималды қол жүгімен саяхаттағанды жөн көреді.

Лоукостер өкілдері компанияның базалық үнемдеу моделі өзгермейтінін атап өтті. Жолаушылар бұрынғысынша қосымша қызметтерді (багаж, тамақтану, орын таңдау) өз қалауынша сатып алып, билет құнын өздері реттей алады.