FlyArystan әуе компаниясының басшысы ауысты

1 наурыздан бастап FlyArystan әуе компаниясының президенті болып Йохан Эйдхаген тағайындалды. Бұл туралы «Эйр Астана» АҚ-ның баспасөз қызметі хабарлады.

Air Astana компаниясының бас директоры Питер Фостер жаңа басшының лоукост-әуе тасымалы саласындағы тәжірибесіне тоқталды.

– Йоханның лоукост-авиакомпаниялар саласында тәжірибесі мен білімі бар. Бұл FlyArystan компаниясының өсу әлеуетін толық пайдалануға мүмкіндік береді. Технологиялық инновациялар әрдайым жоғары сапалы қызмет көрсетуді қамтамасыз етуде, сонымен бірге баға мен жайлылық арасындағы тепе-теңдікті сақтауда маңызды рөл атқарып келеді. Йоханның жетекшілігімен бұл бағыттағы жұмыстар күшейтіледі, – деді Питер Фостер.

Йохан Эйдхаген бұған дейін венгриялық Wizz Air әуе компаниясында басшылық қызметтер атқарған, оның ішінде Абу-Дабидегі басқарушы директор лауазымында жұмыс істеген. Ол бұл қызметте Ричард Леджерді алмастырады. Ричард Леджер «Эйр Астана» АҚ құрамындағы серіктестіктер мен альянстар жөніндегі вице-президент қызметіне ауысады.

Питер Фостердің айтуынша, компания басшылығындағы өзгерістер ұзақмерзімді даму стратегиясын жалғастыруға бағытталған.

– Сәуір айында Air Astana компаниясының бас директоры қызметіне кірісетін Ибрахим Жанлыел және наурызда қаржы директоры ретінде қосылатын Гонсало Пиреспен бірге Air Astana тобы өршіл ұзақмерзімді өсу стратегиясын табысты жүзеге асыруды жалғастырады деп сенемін, – деді ол.

Бұған дейін Питер Фостер 2026 жылдың наурыз айының соңында Air Astana компаниясының бас директоры қызметінен және директорлар кеңесі құрамынан кететіні белгілі болған. Алайда ол авиакомпаниялар тобының директорлар кеңесінің аға кеңесшісі ретінде ынтымақтастығын жалғастырады. Оның орнына Ибрахим Жанлыел тағайындалады. Ол Air Astana тобында 2003 жылдан бері жұмыс істейді, коммерциялық бағыттарда жетекші қызметтер атқарған, ал 2017 жылдан бастап қаржы жөніндегі атқарушы директор лауазымын иеленіп келеді.

FlyArystan – Air Astana компаниясына тиесілі қазақстандық лоукостер әуе компаниясы.