FlyArystan әуе компаниясына не үшін тексеріс жүргізіліп жатқаны белгілі болды

FlyArystan әуе тасымалдаушысының үстінен қол жүгінің артық салмағы үшін бекітілген бірыңғай төлем жүйесіне байланысты тергеу жүргізіліп жатыр. Бұл туралы Өңірлік коммуникациялар қызметінде (ӨКҚ) өткен брифингте ҚР Бәсекелестікті қорғау және дамыту агенттігінің Алматы қаласы бойынша департаментінің басшысы мәлімдеді.

Департамент басшысы Нұржан Нұрланұлының айтуынша, әуе компаниясы қол жүгінің артық салмағы үшін оның мөлшеріне қарамастан бірыңғай тариф бекіткен.

«Яғни, қол жүгі 1 келіге асып кеткен жолаушы да, 5 келі артық салмағы бар жолаушы да бірдей сома төлеуге міндеттелген. Өзге әуе компанияларының тәжірибесін зерделеу көрсеткендей, қол жүгінің нақты артық салмағына қарай сараланған төлем алу мүмкіндігі бар», - деді ведомство басшысы.

Агенттік өкілі мұндай тәжірибенің жолаушылар құқығын бұзатынын және халықаралық авиациялық стандарттарға қайшы келетінін атап өтті.

FlyArystan компаниясына бәсекелестікті қорғау заңнамасын бұзу белгілері бойынша ресми хабарлама жіберілген. Алайда әуе компаниясы қойылған талаптарды орындамаған. Соған байланысты қазіргі уақытта тиісті тергеу амалдары жалғасып жатыр.