FIFA-дағы дағдарыс: Инфантино қызметінен кетуі мүмкін

FIFA президенті Джанни Инфантино ұйымның коммерциялық құқықтарының бір бөлігін жеке инвесторларға беру бастамасынан кейін қызметінен кетуі мүмкін. BBC-дің орыс қызметінің жазуынша, әлемдік футболдағы ең ірі жанжалдардың бірі Инфантиноның болашағына қауіп төндіріп отыр.

Жанжал FIFA әлем чемпионаттары мен өзге де турнирлердің коммерциялық қызметін басқаратын еншілес компания құрып, оның аздаған үлесін жеке инвесторларға сатуды жоспарлағаннан кейін басталды. Бұл бастамаға ең алдымен UEFA қарсы шығып, «футбол сатылмайды» деп мәлімдеді. Кейін Еуропаның бірқатар ұлттық федерациялары Инфантиноның кандидатурасын қолдаудан бас тартып, оның отставкасын талап ете бастады.

Қысым күшейгеннен кейін Инфантино реформаны кейінге қалдырды. Дегенмен сын тоқтаған жоқ. BBC дерегінше, FIFA ішіндегі кейбір серіктестері де одан теріс айнала бастаған. Сондай-ақ америкалық New York Post басылымы АҚШ президенті Дональд Трамптың соңғы уақытта Инфантиномен байланысқа шықпағанын жазды.

Сарапшылардың пікірінше, оқиға бірнеше сценариймен аяқталуы мүмкін. Біріншісі – Инфантиноның өз еркімен қызметтен кетуі. Екіншісі – FIFA кеңесінің немесе ұйымның кезектен тыс конгресінің оны отставкаға жіберуге талпыныс жасауы. Алайда бұл үшін ұйымға мүше ұлттық қауымдастықтардың басым бөлігінің қолдауы қажет.

Тағы бір ықтимал нұсқа – 2027 жылғы наурызда өтетін FIFA президенті сайлауында Инфантиномен бәсекелесе алатын үміткердің пайда болуы. Кандидаттарды ұсыну мерзімі 18 қарашада аяқталады.