ЕҰУ студенттеріне ЖИ мүмкіндіктері таныстырылды

Ағымдағы жылдың 8 сәуірінде Л.Н.Гумилев атындағы ЕҰУ-да дәстүрлі Ғылым онкүндігі аясында Журналистика және медиаөнер кафедрасы ұйымдастыруымен «Qazcontent» seo-маманы, IT маман Аршат Ораз ЖИ-дің мүмкіндіктерін үйретуге бағытталған республикалық «DigiMind: Білім беру» атты шеберлік сыныбын өткізді.       

«Qazcontent» акционерлік қоғамы 2009 жылы ұлттық контент пен қазақ интернет сегментін дамыту мақсатында құрылған. Компанияның басты мақсаты – мемлекеттік интернет-ресурстарды дамыту арқылы қазақстандықтардың ақпараттық қажеттіліктерін қанағаттандыру. Бүгінде акционерлік қоғамда жалпы 5 сайт бар. Олар: baq.kz, el.kz атты жаңалықтар сайттары, adebiportal.kz және e-history.kz тақырыптық сайттары мен ҚР Премьер-Министрінің ресми сайты. 

Спикеріміз Аршат Ораз «Qazcontent» акционерлік қоғамында seo-маманы қызметін атқарады. SEO-маман –  веб-сайттарды Google және Яндекс сияқты іздеу жүйелерінде жоғары позицияларға (ТОП-10) шығарып, органикалық трафикті (тегін келушілерді) арттырумен айналысатын кәсіпқой. Оған қоса, Аршат блогер, Texter.kz   блог-платформасының құрушысы әрі қоғам белсендісі. 

Шеберлік сағатында спикер ChatGPT, Gemini, gamma.app сияқты ЖИ платформаларын оқу мен журналистикада қалай тиімді пайдалануға болатынын көрсетіп, студенттерге ЖИ мүмкіндіктерін үйретіп ғана қоймай, оқытушылар мен білім алушылардың сұрақтарына жауап берді. 

Шараны журналистика және медиаөнер кафедрасының меңгерушісі, PhD Амангелді Шурентаев кіріспе сөзбен ашып, университеттің ғылым онкүндігіндегі бұл да бір айтулы шаралар қатарынан көрінетіндігіне сенім білдірді. Сондай-ақ сөз кезегінде профессор Мұратбек Тоқтағазин журналистика саласына жасанды интеллект жаппай ене бастаған шақта білім алушылардың промтты сәтті, мазмұнды, нақты жаза білуінің маңызы зор екендігіне тоқталып, әріптесі – кафедраның аға оқытушысы, PhD Саягүл Әлімбекованың бастамасымен ұйымдастырылған бұл шараның студенттерге берері мол болатындығын атап көрсетті. Шара барысында ол шынымен солай болып, білім алушылар кәсіби маманның заманауи тұжырымдары мен берген практикалық біліміне ризашылықтарын білдірді. 

Еске сала кетсек, осыдан 2 жыл бұрын университетіміз «Qazcontent» АҚ өзара түсіністік туралы меморандумға қол қойды. Ынтымақтастық «Баспасөз және баспа ісі» кафедрасының филиалын ашуға және болашақ БАҚ мамандарының кәсіби дағдыларын дамыту үшін дуалды білім беруді кеңейтуге бағытталған. 

Таңшолпан Амантай, 

ЕҰУ Журналистика және әлеуметтік 

 ғылымдар Жоғары мектебінің студенті