Еуропа мен Украина соғысты аяқтауға арналған жаңа жоспар әзірлеп жатыр

Еуропалық елдер мен Украина Ресеймен соғысты аяқтауға бағытталған 12 тармақтан тұратын бейбіт жоспар әзірлеу үстінде. Бұл туралы Bloomberg агенттігі өз дереккөздеріне сілтеме жасап хабарлады.

Агенттіктің мәліметінше, құжат қазіргі майдан шебі негізінде қақтығысты тоқтату және соғысты аяқтау шарттарын қамтиды. Бұл бастама Ресей президенті Владимир Путиннің АҚШ-қа жасаған ұсынысына, яғни Украина белгілі бір аумақтардан бас тартса ғана бейбіт келісімге қол жеткізуге болады деген талабына балама нұсқа ретінде қарастырылып отыр.

Bloomberg-тің хабарлауынша, бейбітшілікті қамтамасыз ету жөніндегі комиссияның жұмысын АҚШ президенті Дональд Трамп басқарады.

Жоспарда екі ел арасындағы әскери тұтқындармен алмасу, сондай-ақ Ресейге әкетілген украин балаларының елге қайтарылуы көзделген. Мұның бәрі тараптар бітімге келіп, әскери әрекеттерді тоқтатқаннан кейін жүзеге асырылмақ.

Сонымен қатар Украинаға қауіпсіздік кепілдіктері, соғыстан кейінгі қалпына келтіру үшін қаржылай көмек және Еуропалық одаққа жедел қабылдану жолы ұсынылады.

Басылым атап өткендей, жоспар әзірге талқылау сатысында, ал оның егжей-тегжейлі мазмұны ресми түрде жарияланған жоқ.