Еуроодақпен визалық режим жеңілдейді: Тоқаев Еурокомиссия вице-президентімен осы мәселені талқылады

Мемлекет басшысы Қасым-Жомарт Тоқаев Астанаға сапармен келген Еуропа Одағының Сыртқы істер және қауіпсіздік саясаты жөніндегі Жоғарғы өкілі – Еурокомиссия вице-президенті Кая Калласпен кездесті.

Кездесу барысында Қазақстан мен Еуропа Одағы арасындағы ынтымақтастықтың болашағы талқыланды. Әсіресе энергетика, өнеркәсіп, цифрландыру және Транскаспий халықаралық көлік дәлізі аясындағы ірі инфрақұрылымдық жобаларды жүзеге асыру мәселелеріне ерекше назар аударылды.

Кая Каллас Қазақстанның Еуроодақпен серіктестік және ынтымақтастық туралы келісімге қол қойған аймақтағы алғашқы мемлекеттердің бірі екенін айтты. Оның сөзінше, бұл – екіжақты қарым-қатынастың жоғары деңгейде екенін дәлелдейді. Сонымен қатар ол Қазақстан мен Еурокомиссия арасында визалық режимді жеңілдету туралы келісім жасау үдерісі басталғанын жеткізді.

Мемлекет басшысы бұл жаңалықты қазақстандықтардың үлкен қуанышпен қабылдағанын атап өтті. Президенттің айтуынша, аталған қадам Қазақстан мен Еуропа елдері арасында жеке әрі іскерлік байланыстарды нығайтуға кең мүмкіндік береді.

Сонымен бірге, тараптар халықаралық және өңірлік күн тәртібіндегі өзекті мәселелерді де талқылады. Қасым-Жомарт Тоқаев қазіргі әлемдегі күрделі жағдайларды ескере отырып, кез келген мәселеге байыпты әрі жауапкершілікпен қараудың маңыздылығын атап өтті. Қазақстанның халықаралық мәселелер мен қақтығыстарды тек дипломатиялық жолмен шешуге бейілді екеніне тоқталды.

Кездесуде «Орталық Азия – Еуропа Одағы» форматындағы қарым-қатынастың қазіргі жағдайы да қаралды.