Еуроодақ Ресейге қарсы жаңа санкция енгізді: тізімге Қазақстандағы ұйымдар да енді

Еуропа одағы Украинадағы соғысқа байланысты Ресейге қарсы шектеу шараларының 21-топтамасын қабылдады. Жаңа санкциялар тізіміне Қазақстанда орналасқан бірқатар ұйым да енгізілді, деп хабарлады Еуроодақ кеңесінің баспасөз қызметі.

Жаңа топтама Ресей экономикасына және оның соғысты қаржыландыру мүмкіндігіне ықпал ететін салаларды қамтиды. Барлығы 218 жеке және заңды тұлғаға шектеу қойылған. Оның 48-і – жеке тұлға, 170-і – ұйым.

Еуроодақ 100-ден астам банк пен сандық активтермен жұмыс істейтін ұйымға, Ресейдің жасырын мұнай тасымалына қатысы бар 40-тан астам кемеге, сондай-ақ Ресей мен Беларусьтегі бірнеше мұнай өңдеу зауытына санкция енгізді. Тізімге алыс қашықтыққа ұшатын дрондар шығаратын 50-ден астам әскери-өнеркәсіп кәсіпорны да енген.

Сонымен бірге Еуроодақ кеңесі қосарлы мақсатта пайдаланылатын тауарлар мен технологияларға қатысты қатаң экспорттық шектеу қолданылатын ұйымдар тізіміне тағы 51 мекемені қосты. Оларға Ресейдің әскери-өнеркәсіп кешеніне қолдау көрсетті деген негіз келтірілген.

Бұл ұйымдардың бір бөлігі Қытайда, соның ішінде Гонконгте, Үндістанда, Қазақстанда, Қырғызстанда, Түркияда және Біріккен Араб Әмірліктерінде орналасқан. Еуроодақ олардың Ресейге шағын электронды бөлшектерді, сандық бағдарламамен басқарылатын станоктарды және жартылай өткізгіштерді өңдеуге арналған жабдықтарды жеткізуге қойылған шектеулерді айналып өтуге көмектескенін мәлімдеді.

Қазақстандағы нақты қай ұйымдардың санкция тізіміне енгені берілген хабарламада көрсетілмеген.