ЕУРО-2024: Қуаныштың ишарасын танытқан футболшының басы дауға қалды

Түркия ұлттық құрама ойыншысы Мерих Демирель жеңістен кейінгі қолымен жасаған ишарасының салдарынан басы дауға қалды. ЕУРО-2024 турнирі аясында Австрия мен Түркия құрамалары арасында матч өтті. Австрия қақпасына екі гол соғып Түркияны жеңіске жетелеген Мерих Демирельдің үстінен матч соңында жасаған қылығы үшін арыз-шағымдар түсті, деп хабарлайды Sports.ru.

ЕУРО-2024 турнирі аясында Австрия мен Түркия арасында тартысты матч өтті. Нәтижесінде Түркия құрамасы жеңіске жетіп, ширек финалға жолдама алды. Австрия қақпасынан екі рет саңылау тапқан Мерих Демирель матчтан кейінгі әрекетімен көпшілік назарына түсті. Австриялық журналистер бұл әрекетті фашистік ишара деп танып, УЕФА басшылығынан Демирельге қатысты шара қолдануларын сұрайды.

Австриялық журналист Михаэль Бонвалот: “Ол ашық түрде фашисттік әрекет жасады. Тарихқа көз салсақ, осы ишараның салдарынан мыңдаған адам көз жұмды. Мерихтің әрекетіне қатысты УЕФА-ның шара қолдануын талап етемін”.

Аталмыш әрекетке Франция және Австрия мемлекеттерінде қатаң тыйым салынғаны белгілі болды. Ол ишараны жасаған жан заңмен қудаланады.

Түркия құрамасының ойыншысы Мерих Демирель: “Біз Австрияны жеңдік. Жеңістен кейінгі қуанышымды қолымның ишарасы арқылы білдірдім және бұны жасырмаймын. Біз түркілерміз, түркілерді біріктіретін белгіні көрсетуімнің еш айыбы жоқ. Бұл белгіні алаңда менен бөлек бірнеше адам да көрсетті. Түркі болғаныммен мақтанамын”.

Айта кететін жайт, аталмыш әрекет Түркия елінде танымалдылыққа ие. Бұл белгіні Түркия президенті Ердоғанның көпшілік алдында қолданатыны да бәрімізге аян. Түркия басшысы қолмен жасалатын белгіні түркілердің ынтымастығы деп танитынын айтты.

Автор: Рахат Жора