Ескі көлігін өткізген қазақстандықтарға 750 мың теңгеге дейін жеңілдік берілуі мүмкін

Қазақстанда ескі көліктерді кәдеге жарату бағдарламасын биыл қайта іске қосу жоспарланып отыр. Ескі көлігін өткізген азаматтарға жаңасын сатып алу үшін 315 мыңнан 750 мың теңгеге дейін жеңілдік сертификаты беріледі, деп хабарлады inbusiness.kz.

«Жасыл даму» мәліметінше, сертификаттың құны көлік санатына байланысты белгіленеді. M1 санатындағы жеңіл көліктерге – 315 мың теңге, M2 санатындағы жолаушылар көлігіне – 550 мың теңге, N1 және N2 санатындағы жүк көліктеріне – 550 мың теңге қарастырылған.

Ал M3 санатындағы ірі жолаушылар көлігі мен N3 санатындағы ауыр жүк көлігін өткізгендерге 750 мың теңгелік сертификат беру көзделіп отыр.

Сертификатты ескі көлікті кәдеге жаратқаннан кейін жаңа автомобиль сатып алу кезінде пайдалануға болады.

Сонымен қатар кәдеге жарату алымынан түсетін қаражаттың бір бөлігін өрттің алдын алу шараларына және орман мекемелерін қажетті жабдықпен қамтамасыз етуге бағыттау жоспарланған. Мұндай норма экология мәселелеріне қатысты заңда қарастырылған.