Есімі – елдің басты Заңы: Аты Конституция есімді кейуана тарихи таңдау жасады

Республикалық референдумда дауыс берушілердің арасында ерекше бір жан көпшіліктің назарын аударды. Ол – 68 жастағы Конституция Нарбаева. Есімі елдің Ата Заңымен аттас кейуана үшін бұл күн жай ғана саяси науқан емес, өз тағдыры мен азаматтық ұстанымының тоғысқан сәті болды.

1958 жылы дүниеге келген Конституция әжей өзінің ерекше есімін мақтанышпен иеленіп келеді. Ол үшін бұл атау – жай ғана сөз емес, жарты ғасырдан астам уақыт бойы арқалап келе жатқан үлкен жауапкершілік. Дәуірлер ауысып, заңдар жаңарса да, оның ел болашағына деген сенімі мен белсенділігі еш өзгермеген.

«Бүгінгі күннің маңызы мен үшін ерекше. Халықтың қолдауын, бірлігін сезіну – үлкен бақыт. Әрбір іс шын жүректен жасалғанда ғана берекелі болады», – дейді Конституция Нарбаева ақжарма тілегін білдіріп.

Сайлау учаскесіне келіп өз таңдауын жасаған кейуананың бұл қадамы – символдық мәнге ие. Конституция өзгеріске түсіп жатқан тарихи сәтте, есімі заңмен өзектес жанның дауыс беруі жиналғандарды сүйсіндірді. Бұл – жеке таңдау ғана емес, елдің ертеңіне деген адалдықтың шынайы көрінісі.