Ермахан Ибраимов Конституциялық реформаға қатысты пікір білдірді

Бокстан Сидней Олимпиадасының чемпионы, Атланта Олимпиадасының қола жүлдегері Ермахан Ибраимов елде талқыланып жатқан Конституциялық реформа жобасына қатысты пікір білдіріп, ұсынылып отырған өзгерістерді қолдайтынын мәлімдеді.

– Бүгінде елімізде Конституциялық реформа жобасы бойынша кең көлемді қоғамдық талқылау өтіп жатыр. Бұл – Қазақстанның алдағы жылдардағы даму бағытын, мемлекеттік басқару жүйесінің келешегін айқындайтын аса маңызды кезең. Мен Қазақстан азаматы әрі қоғам белсендісі ретінде ұсынылып отырған өзгерістердің мәні зор екеніне сенемін және мемлекетті одан әрі жаңғыртуға бағытталған бастамаларды қолдаймын, – деді Ермахан Ибраимов.

Оның айтуынша, 2022 жылы басталған Әділетті Қазақстанды құру жолы – кездейсоқ шешім емес, ел болашағын нығайтуға бағытталған жүйелі қадам. Қазіргі реформалар сол бағыттың заңды жалғасы екенін атап өтті.

– Негізгі мақсат – халықтың мүддесін білдіретін институттардың ықпалын күшейту, мемлекет пен қоғам арасындағы сенімді арттыру. Спорт саласында жүрген адам ретінде айтарым: үлкен жетістікке жету үшін тәртіп, жауапкершілік және бірлік қажет. Мемлекет те дәл солай – берік қағидаттар мен ортақ мақсатқа сүйенгенде ғана қуатты бола алады, – деді ол.

Олимпиада чемпионы шынайы патриотизм нақты іспен дәлелденетінін атап өтті. Оның пікірінше, бұл ұстаным спорт қауымы үшін де маңызды, әсіресе бұқаралық спортты дамыту, жас дарындарды қолдау және салауатты өмір салтын насихаттау ісінде.

– Қоғамдық талқылаудың маңызы ерекше. Әр азаматтың пікірі ескеріліп, ашық диалог орнағанда ғана реформалар тиімді жүзеге асады. Бірлескен ой мен ортақ жауапкершілік – табыстың кепілі, – деді Ермахан Ибраимов.

Ол Конституциялық реформалар еліміздің тұрақтылығын нығайтып, тәуелсіздікті бекемдей түсетініне және келер ұрпаққа жарқын болашақ сыйлайтынына сенім білдірді.

– Біз бірлік пен өзара сенім арқылы қуатты, әділетті әрі өркендеген Қазақстанды бірге қалыптастырамыз, – деп түйіндеді спортшы.