Ерлан Қошанов Өзбекстан Сенатының төрағасымен кездесті

18 тамыз күні Астанада Мәжіліс спикері Ерлан Қошанов ресми сапармен келген Өзбекстан Республикасы Олий Мәжілісі Сенатының төрағасы Танзила Нарбаевамен кездесті. Тараптар парламентаралық ықпалдастықты арттыру және екіжақты қарым-қатынастың өзекті мәселелерін талқылады.

Кездесу барысында Ерлан Қошанов өзбек халқын алдағы Тәуелсіздік күнімен құттықтап, бауырлас елге бақ-береке тіледі. Ол Қазақстан мен Өзбекстан арасындағы ынтымақтастық стратегиялық серіктестік пен одақтастық рухында дамып келе жатқанын атап өтті.

– «Көшбасшыларымыздың кездесулерінің қарқыны мен нәтижелігі біздің парламентаралық байланысымыздың сипатын айқындайды. 2021 жылы Шавкат Мирзиёевтің Қазақстанға сапары кезінде Президенттеріміз барлық уағдаластықтың орындалуын парламенттер бақылауы тиіс деген ортақ пікірге келді. Осылайша Парламентаралық ынтымақтастық кеңесі құрылды. Бүгінгі таңда Кеңес тиімді жұмыс істеуде, Ташкент пен Алматыда екі отырыс өтті. Президенттер арасындағы барлық келісім парламентшілердің бақылауында», – деді Мәжіліс спикері.

Өз кезегінде Танзила Нарбаева Қазақстанға көрсеткен қонақжайлық үшін алғысын білдіріп, екі ел арасындағы парламентаралық байланыс нығая беретініне сенім білдірді.

– «Көптеген мәселе бойынша біздің көзқарасымыз ұқсас. Президенттеріміздің басты бағыты – азаматтардың өмір сапасын жақсарту, бейбітшілік, қауіпсіздік пен тұрақтылықты қамтамасыз ету. Екі ел арасындағы тауар айналымын 2030 жылға қарай 10 млрд долларға жеткізу міндеті қойылды. Бұл мақсатқа жету үшін барлық мүмкіндік бар. Біздің міндетіміз – Президенттеріміздің келісімдерін заңнамалық тұрғыдан қамтамасыз ету», – деді ол.