Ерлан Қошанов: Мемлекет пен қоғам арасындағы тұрақты диалогтың жұмыс істейтін жүйесін құруға тиіспіз

Қазақстан Халық Кеңесінің Төрағасы Ерлан Қошанов еліміздің қоғамдық кеңестерінің өкілдерімен кездесу өткізді. Жиында Мемлекет басшысының қоғамдық институттардың өкілеттіктерін кеңейту жөніндегі тапсырмаларын жүзеге асыру және өзара іс-қимылды арттырудың басты бағыттары талқыланды.

Кездесу барысында Президент тапсырмалары шеңберінде Халық Кеңесі мүшелері мен өңірлік Қоғамдық кеңестер арасындағы тығыз әрі жүйелі әріптестіктің маңызы атап өтілді. Конституциялық заңға сәйкес, Халық Кеңесінің жергілікті деңгейдегі қызметі осы қоғамдық кеңестер арқылы қамтамасыз етіледі.

Ерлан Қошанов өз сөзінде өңірлермен ашық әрі тұрақты байланыс орнатудың басты міндет екеніне тоқталды:

«Мемлекет басшысы өңірлермен қоғамдық кеңестер арқылы берік байланыс орнату міндетін қойды. Бұл бізге жаңа мүмкіндіктерге жол ашады. Әр адамның пікірі ескеріліп, әр азамат елдік мәселелерді талқылауға өз үлесін қоса алады. Біздің басты міндетіміз – халықтың үніне дер кезінде құлақ асып, талап-тілегін тыңдай білу. Алдағы уақытта осындай басқосуларды тұрақты түрде өткіземіз. Ортақ мақсатқа қол жеткізу үшін өздеріңізбен бірлесіп жұмыс атқаратын боламыз».

Бүгінде елімізде 228 қоғамдық кеңес жұмыс істейді, оларға 3,5 мыңға жуық сарапшы мүше. Халық Кеңесінің негізгі мақсаты – аймақтардан келіп түсетін бастамалар мен өзекті маселелерді жалпыұлттық күн тәртібіне біріктіріп, оларды шешудің нақты тетіктерін әзірлеу. Осыған орай, бейінді комитет пен Хатшылыққа деректерді тұрақты түрде жинақтау тапсырылды. Қалыптастырылатын Жүйелі проблемалардың бірыңғай картасы өңірлік түйткілдерді анықтап, Үкімет шешімдерін қабылдауға немесе заңнамаға өзгерістер енгізуге негіз болады.

Сонымен қатар жиында мынадай маңызды бастамалар көтерілді:

• Заңнаманы жетілдіру: 2015 жылы қабылданған «Қоғамдық кеңестер туралы» заңды Халық Кеңесі туралы Конституциялық заңмен сәйкестендіру үшін арнайы жұмыс тобы құрылады.

• «Нөлдік оқылым» тетігі: Нормативтік актілер мен мемлекеттік бағдарламалар қабылданғанға дейін міндетті қоғамдық сараптамадан өтіп, ықтимал тәуекелдер алдын ала бағаланады.

• Шенеуніктердің есеп беруі: Мемлекеттік орган басшыларын қоғамдық кеңестердің ұсынымдары бойынша жеке есеп беруге міндеттеуді заңнамалық тұрғыдан бекіту ұсынылды.

• Бастамаларды сүйемелдеу: Алматы қаласы Қоғамдық кеңесінің төрағасы Нұржан Жақыповтың ұсынысы бойынша, азаматтық бастамалардың сапасын арттыру мақсатында әрбір жобаға Халық Кеңесінің бір мүшесі бекітілетін болады.

• Аналитикалық «Қоғам баяндамасы»: Өңірлердегі шынайы ахуалды көрсететін жыл сайынғы сараптамалық баяндама дайындау ұсынылды.

Жиын барысында Қазақстан Халық Кеңесінің мүшесі Нұртай Сабильянов қоғамдық кеңестерді қалыптастырудың бірыңғай ашық стандарттарын енгізуді ұсынса, Маңғыстау облысы Қоғамдық кеңесінің төрағасы Бекмұрат Жүсіпов өзара іс-қимыл тәртібін жетілдіру бойынша пікір білдірді.

Алқалы жиынға Президент жанындағы ҚСЗИ директоры Жандос Шаймарданов, «Қазақстандық қоғамдық даму институты» КЕАҚ Басқарма төрағасы Жұлдызай Ысқақова және өзге де сарапшылар қатысты.