Ерлан Карин ЮНЕСКО және ИСЕСКО істері жөніндегі Ұлттық комиссияның отырысын өткізді

Мемлекеттік кеңесші Ерлан Кариннің төрағалығымен Қазақстан Республикасының ЮНЕСКО және ИСЕСКО істері жөніндегі Ұлттық комиссиясының жылдық қорытынды жиыны өтті.

Ауқымды іс-шараға бейінді министрліктер мен ведомстволардың өкілдері, комитет жетекшілері және ЮНЕСКО-ның еліміздегі сарапшылар қоғамдастығының мүшелері қатысты. Басқосу барысында аталған халықаралық ұйымдармен өзара іс-қимылды тереңдетудің басымдықтары мен алдағы даму жоспарлары жан-жақты талқыланды.

Мемлекеттік кеңесші өз сөзінде Мемлекет басшысының ЮНЕСКО-мен серіктестікті нығайтуға ерекше мән беретінін атап өтіп, Президент тапсырмаларын сапалы әрі дер кезінде орындаудың маңыздылығына тоқталды.

Отырыс қорытындысы бойынша комиссия мүшелеріне бірқатар өзекті міндеттер жүктелді:

 Инновация және технология: Жасанды интеллект саласындағы озық әлемдік тәжірибелерді зерделеу;

 Экология: Жаһандық су күн тәртібін белсенді ілгерілету;

 Мәдени мұра: Астанада өткен Өңірлік экологиялық саммит пен ЮНЕСКО аясында ұйымдастырылған Алтын Ордаға арналған халықаралық симпозиумның нәтижелерін қорытындылау.

Сонымен қатар жиында алдағы уақытта ұйымдастырылатын халықаралық маңызы бар іс-шаралардың дайындық барысы қаралды. Атап айтқанда:

ЮНЕСКО-ның штаб-пәтерінде опера әншісі Ермек Серкебаев пен белгілі режиссер Абдолла Қарсақбаевтың 100 жылдық мерейтойларын атап өту мәселесі пысықталды.

Сондай-ақ, отандық делегацияның Пусан қаласында өтетін ЮНЕСКО-ның Дүниежүзілік мұра комитетінің 48-ші сессиясына қатысу жоспары талқыланды. Айта кету керек, бұл сессияда Қазақстан тарапынан ұсынылған «Маңғыстаудың жерасты мешіттері» номинациясы қаралатын болады.