$ 464.77 € 541.36 ₽ 5.41

Ерлан Қарин Қазақстанның Вице-Президенті қызметіне ұсынылды

Абдрахманов Мағжан
31 тамыз 2026, 10:51
Ерлан Қарин Қазақстанның Вице-Президенті қызметіне ұсынылды Сурет авторы: Ақорда

Президент Қасым-Жомарт Тоқаевтың ұсынуымен Ерлан Қарин Қазақстанның Вице-Президенті қызметіне кандидат ретінде ұсынылды. Оның кандидатурасын Құрылтай депутаттарының жалпы санының көпшілігі қолдауы тиіс.

Ерлан Қарин бұған дейін Президент Әкімшілігі басшысының бірінші орынбасары қызметін атқарған. Ол 1976 жылы туған, саяси ғылымдар кандидаты. Мемлекеттік органдарда, зерттеу ұйымдарында, «Нұр Отан» партиясында және «Қазақстан» республикалық телерадиокорпорациясында жұмыс істеген.

2019 жылдан бастап Президент Әкімшілігінде кеңесші, көмекші, Мемлекеттік хатшы және Мемлекеттік кеңесші қызметтерін атқарды. 2026 жылғы маусымда Президент Әкімшілігі басшысының бірінші орынбасары болып тағайындалған.

Вице-Президент билік сабақтастығын қамтамасыз етуге, Президент атынан мемлекеттік органдармен және халықаралық деңгейде өзара іс-қимыл жасауға, сондай-ақ Мемлекет басшысы жүктеген өзге де міндеттерді атқаруға тиіс.

Президент өкілеттігі мерзімінен бұрын тоқтаған жағдайда Мемлекет басшысының міндетін атқару Вице-Президентке өтеді.

Қазақстанда Вице-Президент лауазымы бұған дейін 1990–1996 жылдары болған. Сондықтан Қариннің кандидатурасы мақұлданса, ол бұл қызмет қайта енгізілгеннен кейінгі алғашқы Вице-Президент болады.

#Ерлан Қарин

Соңғы жаңалықтар