ERG-дегі мемлекеттің 40 пайыз үлесі «Самұрық-Қазынаға» өтті

Eurasian Resources Group (ERG) компаниясындағы мемлекеттің 40 пайыз акциясы «Самұрық-Қазына» ұлттық әл-ауқат қорының меншігіне өтті. Бұл туралы қордың баспасөз қызметі хабарлады.

Мәміле 4 тамызда Үкімет шешіміне сәйкес жүзеге асырылған. Бұған дейін ERG-дегі 40 пайыз мемлекеттік үлес Қаржы министрлігінің Мемлекеттік мүлік және жекешелендіру комитетіне тиесілі болған.

«Самұрық-Қазына» бұл шешім қордың мемлекеттік активтерді тиімді басқару жөніндегі міндетіне сәйкес келетінін мәлімдеді.

ERG – Қазақстанда, Бразилияда, Африка мен Еуропаның бірқатар елінде жұмыс істейтін халықаралық тау-кен және металлургия тобы. Компания акцияларының 20,7 пайызы Әлижан Ибрагимовтың мұрагерлеріне, ал 39,3 пайызы қазақстандық кәсіпкер Шахмұрат Муталипке тиесілі.

Муталип биыл мамырда Патох Шодиев пен Александр Машкевич мұрагерлерінің ERG-дегі үлестерін сатып алған болатын.

Бұған дейін Bloomberg агенттігі ERG-дің қазақстандық және халықаралық екі бөлек компанияға бөліну мүмкіндігін қарастырып жатқанын жазған. Алайда Өнеркәсіп және құрылыс министрлігі шілде айының соңындағы жағдай бойынша компаниядан мұндай өтініш түспегенін мәлімдеген.