Ердоған «Qoja Ahmet Yasaui» орденінің ең алғашқы иегері атанды

Қасым-Жомарт Тоқаев Түркия Президенті Режеп Тайип Ердоғанды «Qoja Ahmet Yasaui» орденімен марапаттады. Бұл туралы Ақорданың баспасөз қызметі хабарлады.

Мемлекет басшысы марапатты табыстау кезінде Қожа Ахмет Ясауи тұлғасының түркі әлеміндегі рухани маңызын атап өтті.

– Әзірет Сұлтан түркілік рух пен ислам өркениетін үйлестіре білді. Оның мәдени мұрасы Ұлы далада ғана емес, Анадолы жерінде де өшпес із қалдырды. Түркі әлеміне ортақ көптеген ғұламалар Әзірет Сұлтанның ізбасары саналады, – деді Тоқаев.

Президенттің айтуынша, бұл орден Қазақстанның дамуына үлес қосқан отандық және шетелдік қайраткерлерге беріледі.

– Бұл – беделі биік, бағасы жоғары марапат. Біз бұл орденді әзірлеген кезде ашық жасыл түске басымдық бердік. Ал күміс тазалықтың нышанын білдіреді. Бұл марапат Әзірет Сұлтанның тағылымын дәріптейді, – деді Мемлекет басшысы.

Тоқаев Ердоғанның аталған орденнің алғашқы иегері екенін атап өтті.

– Мұның символдық мәні өте зор. Бұл марапат – рухани бауырластықтың жарқын көрінісі. Қадірлі досым, осы жоғары марапатты түркі әлеміндегі көшбасшылық рөліңізге берілген лайықты баға деп қабылдаңыз, – деді ол.

Өз кезегінде Ердоған марапат үшін алғыс білдірді.

– Бұл орденді Түркия Республикасы мен түрік халқына көрсетілген құрметтің белгісі деп қабылдаймын. Елдеріміз арасындағы бауырластық нығая беретініне сенемін, – деді Түркия Президенті.