Еңбек министрлігі жұмыс таба алмай жүрген қазақстандықтарға көмектеспек

Қазақстанда жұмыс іздеуде кедергілерге тап болған азаматтарға көрсетілетін атаулы көмек көлемі артады. Еңбек және халықты әлеуметтік қорғау министрлігінің хабарлауынша, бұл шаралар бірінші кезекте 93,5 мың адамнан тұратын нысаналы топты қамтымақ.

Ведомство мәліметінше, өңірлердегі мансап орталықтарының жұмыс форматы түбегейлі өзгереді. Жаңа алгоритм бойынша негізгі күш жұмысқа өз бетінше орналаса алмайтын басым топтағы ізденушілерге бағытталады.

Министрлік жаңа цифрлық құралдарды іске қосты. Енді мансап орталықтары басым топтағы барлық ізденушілерді арнайы ақпараттық панель арқылы нақты уақыт режимінде аты-жөні бойынша көре алады. Бұл жүйе әр адамға қандай нақты көмек көрсетілгенін күн сайын қадағалап отыруға мүмкіндік береді.

Нысаналы топқа келесі санаттағы 93,5 мың адам енді:

• Әлеуметтік жағдайы төмен азаматтар;

• Жұмыс тәжірибесі жоқ жандар;

• Еңбек өтілінде жарты жылдан астам үзілісі барлар;

• Тек мектеп білімі бар ізденушілер;

• Техникалық және кәсіптік білімі бар мамандар.

Министрлік көмектің тиімділігін арттыру үшін бұл тізімнен жоғары білімі бар және жақында жұмыс істеген азаматтарды шығарып тастады. Мақсат — қолдауды ең әлсіз топтарға шоғырландыру.

Қазіргі мониторинг деректері бойынша, аталған топтың тек 39,8 мыңы ғана жұмыспен қамту шараларымен қамтылған. Осыған байланысты Министр өңірлік орталықтарға әрбір жұмыссызбен жеке жұмыс істеп, олар жұмысқа орналасқанша толық сүйемелдеуді қамтамасыз етуді тапсырды.

Сонымен қатар мамандар алдағы 7-10 жылда Қазақстанда кәсіби кадрлардың тапшылығы туындауы мүмкін екенін ескертті. Бұл елдегі негізгі мамандардың басым бөлігі 40 пен 59 жас аралығындағы азаматтар екендігімен байланысты.