Ең төменгі жалақы мөлшері көтерілмейтін болды

Қаржы министрлігінің есебінше, Қазақстанда ең төменгі жалақы мөлшері кемінде 90 мың теңге болуы тиіс. Алайда Үкімет қазіргі экономикалық жағдайға байланысты 2026 жылғы 1 қаңтардан бастап оны көтеруден бас тартты.

«Әзірге ең төменгі жалақыны көтеру жоспары жоқ. Қазіргі мөлшері – 85 мың теңге, әзірше оны арттыруды қарастырған жоқпыз», – деді вице-премьер, ұлттық экономика министрі Серік Жұманғарин Үкіметтегі брифингте.

Маусым айының соңында республикалық бюджет ЕТЖ-ны көтеруге мүмкіндік береді деп мәлімдеген қаржы министрі Мәди Тәкиев бұл пікірдің есептік болжамға негізделгенін түсіндірді.

«Есеп бойынша ең төменгі мөлшер орта есеппен 90 мың теңге болуы тиіс. Бірақ қазіргі жағдайды ескере отырып, Серік Мақашұлы айтқандай, оны осы деңгейде қалдырамыз», – деді министр.

Еске салсақ, маусым айында Мәди Тәкиевпен қатар Еңбек және халықты әлеуметтік қорғау министрі Светлана Жақыпова да 2026 жылғы 1 қаңтардан бастап ең төменгі жалақыны көтеру жоспарланғанын айтқан болатын. Ол кезде бұл шешім еңбек өнімділігі мен аймақтар мен салалар бойынша медиандық жалақы көрсеткіштеріне негізделетіні хабарланған еді. Зерттеулер аяқталған соң, жыл соңында келесі жылғы ЕТЖ мөлшері нақтылануы тиіс еді.